दमक, चैत २७ ।
झापको लखनपुरस्थित आदिवासी रंगशालामा जारी पूर्वाञ्चलस्तरीय फुटबल प्रतियोगितामा लखनपुर ११ विजयी हुँदै सेमिफाइनल प्रवेश गरेको छ ।
आइतबारको खेलमा शरणामति फेन्स क्लब झापा–७ लाई ५–० को फराकिलो गोल अन्तरले पराजित गर्दै लखनपुरले अन्तिम चारमा आफ्नो स्थान सुरक्षित गरेको हो । लखनपुरका लागि खेलको १८ औँ मिनेटमा जर्सी नम्बर ९ का विकास लिम्बूले गोलको खाता खोलेका थिए । त्यस्तै खेलको दोस्रो हाफको पहिलो मिनेटमा नै जर्सी नम्बर ११ का वर्तमान राईले लखनपुरको अग्रतालाई दोब्बर बनाए । दोस्रो हाफको ८औँ, २४औँ र २९औँ मिनेटमा जर्सी नम्बर २७ का राज पौडेलले लगातार गोल गर्दै ह्याट्रिक गर्दै पूरा गर्दै फराकिलो जित सुनिश्चित गरेका थिए । उनी खेलको म्यान अफ दी म्याच घोषित भए ।‘ए’ डिभिजनका खेलाडीले भरिभराउ रहेको दुई टिमको खेल प्रतिष्पर्धात्मक भएको थियो । खेल अवधिभर गोल गर्ने अवसर गुमाउँदा शरणामतिले फराकिलो अन्तरको हार व्यहोरेको हो ।
प्रतियोगिता अन्तर्गत सोमबारको खेल उर्लाबारी फुटबल क्लब र विर्तामोड युनाईटेड क्लबबीच हुने छ । स्थानीय नन्द–चन्द्रकुमारी आङ्देम्बे स्मृति प्रतिष्ठानको आयोजनामा भएको प्रतियोगिता बैशाख २ गते सम्म चल्ने छ । प्रतियोगिताका विजयीले नगद १ लाख १ हजार १ सय ११ र उपविजेताले नगद ५० हजार १ सय ११ मेडल र ट्रफी प्राप्त गर्ने छन् ।