दमक, २५ चैत ।
झापाकको लखनपुरस्थित आदिवासी रङ्गशालामा शुक्रबारदेखि पूर्वाञ्चलस्तरीय नकआउट फुटबल प्रतियोगिता सुरु भएको छ ।
नन्द–चन्द्रकुमारी आङ्देम्बे स्मृति प्रतिष्ठानले आयोजना गरेको प्रतियोगिताको उद्घाटन खेलमा पूर्वी क्षेत्रीय प्रहरी कार्यालय रानीको टिमले विजयी सुरुवात गरेको छ । प्रहरी टिमले झापाको बलियो दाबेदार सैनिक फुटबल क्लबलाई १ का विरुद्ध २ गोलले पराजित गर्दै अघिल्लो स्पर्धाका लागि स्थान पक्का गरेको हो ।
दोस्रो हाफको २ मिनेट नबित्दै सैनिकका तर्फबाट कप्तान विकेश सुब्बा (जर्सी नम्बर १०) ले प्रतियोगिताकै पहिलो गोल गरेका थिए ।
तर, सैनिकको कमजोर रक्षात्मक पंक्तिलाई झुक्याउँदै प्रहरीका खेलाडी सुशील यादव (जर्सी नम्बर १४) ले क्रमशः ५८ र ६० मिनेटमा गोल गर्दै टिमको जित सुनिश्चित गरेका थिए । उनी खेलको म्यान अफ दी म्याच घोषित भए ।
प्रतिष्ठानले आयोजना गरेको प्रतियोगिता आगामी बैशाख २ गतेसम्म चल्नेछ । फाइनल विजेताले नगद १ लाख १ हजार १ सय ११ र उपविजेताले नगद ५० हजार १ सय ११ सहित ट्रफी र प्रमाणपत्र पाउने छन् ।
आदिवासी रंगशालामा जारी प्रतियोगिताको उद्घाटन काँग्रेस केन्द्रीय सदस्य एवम् सांसद भीष्मराज आङ्देम्बेले गर्नुभएको थियो । कार्यक्रममा सांसद महेन्द्रकुमारी सुब्बा र समाजसेवी पूर्णानन्द शर्माले बोल्नुभएको थियो । प्रतियोगिता अन्तर्गत शनिबारको खेल लखनपुरस्थित सशस्त्र प्रहरी बल पाथीभरा गण र काँकडभिट्टा फुटबल ट्रेनिङ सेन्टरबीच हुने आयोजक संस्थाका सचिव विष्णु सुब्बाले जानकारी दिनुभयो । प्रतिष्ठानले आगामी वर्ष राष्ट्रस्तरीय फुटबल प्रतियोगिता गर्ने अध्यक्ष गणेश आङ्देम्बेले बताउनुभयो ।
नयाँअनलाइनसँग एप्समा पनि जोडिनुसक्नुहुनेछ । एन्ड्रइडको लागि यहाँ क्लिक गर्नुहोस् । त्यसैगरी हामीलाई फेसबुक, ट्वीटर र युट्युवमा पनि पच्छ्याउन सक्नुहुनेछ ।
