दमक, १९ चैत ।
साहित्यकार राजकुमार सुब्बा अनिश्चितको कविता कृति ‘सुदुर गाउँमा’ लोकापर्ण गरिएको छ ।
शनिबार दमकमा रुबाई मञ्च नेपालले औपचारिक कार्यक्रम गर्दै सुब्बाको कविता कृति सार्वजनिक गरेको हो । लोकार्पण कार्यक्रममा साहित्यकार मिश्र बैजयन्ती, मुनाराज शेर्मा र जितेन मुस्कानले कृतिमाथि टिप्पणी गरेका थिए ।
बैजयन्तीले कवि सुब्बाको कवितामा पहिचानका कुरा समेटिएको बताइन् । उनले ‘अनिश्चित’ ले आफ्नै जीवनशैलीलाई कविताका रूपमा उत्कृष्ट ढङ्गले पस्के पनि केही सीमा र कमजोरी रहेको टिप्पणी गरेकी छन् । त्यसैगरी, शेर्माले सुब्बाको कविता संग्रह सशक्त रहेको बताउँदै पछिल्लो समय राजधानी बाहिर दमकमा पनि राम्रो कलम चलाउन सक्ने साहित्यकारहरुको जन्म भइरहेको उनले बताए । त्यस्तै, मुस्कानले कवि सुब्बाका कविताले किराती मुन्धुमलाई समेत चुनौति दिएको बताए ।
कार्यक्रमका प्रमुख अतिथि कवि देवान किरातीले पछिल्लो समय मोफसलमा साहित्यिक गतिविधि बढ्नु सुखद रहेको बताए । कार्यक्रममा साहित्यकारहरु प्रकाश बुढाथोकी, अभागी थेगुवा र सामाजिक व्यक्तित्व बालचन्द्र सुब्बाले शुभकामना राखेका थिए भने कार्यक्रमको सञ्चालन विवश बलिभद्र कोइरालाले गरेका थिए । कार्यक्रम रुबाइ मञ्च नेपालका अध्यक्ष कमन देवानको सभापतित्वमा सम्पन्न भएको थियो ।
साहित्यकार सुब्बा दमकमा बसेर निरन्तर साहित्य क्षेत्रमा क्रियाशील छन् । उनले यसअघि ‘जिन्दगी छ’ नामक गजल संग्रह प्रकाशन गरिसकेका छन् ।
नयाँअनलाइनसँग एप्समा पनि जोडिनुसक्नुहुनेछ । एन्ड्रइडको लागि यहाँ क्लिक गर्नुहोस् । त्यसैगरी हामीलाई फेसबुक, ट्वीटर र युट्युवमा पनि पच्छ्याउन सक्नुहुनेछ ।
