झापा, १३ चैत ।
नेपाल पत्रकार महासंघ झापा शाखाले आइतबार ३ वर्षे कार्य योजना पारित गरेको छ ।
विर्तामोडमा सम्पन्न बैठकले अध्यक्ष तारामणि सापकोटाबाट प्रस्तुत कार्य योजना छलफल र परिमार्जनसहित पारित गरेको शाखाका सह–सचिव केशव भट्टराईले जानकारी दिनुभयो । पत्रकार महासंघले सञ्चारकर्मीको दक्षता अभिबृद्धिका लागि गुणस्तरीय तालिम सञ्चालन गर्नुका साथै अतिथि आवास गृह र सुबिधा सम्पन्न सभाकक्ष निर्माण गर्ने तयारी गरेको छ । कार्ययोजना कार्यान्वयनका लागि अध्यक्ष सापकोटाकै संयोजकत्वमा भवन निर्माण समिति निर्माण, उपाध्यक्ष एकराज गिरीको संयोजकत्वमा पत्रकार सहारा उपचार कोष गठन गरिएको छ ।
त्यस्तै उपाध्यक्ष भीमा शिवाकोटीको संयोजकत्वमा पुस्तकालय समिति निर्माण भएको छ । सह–सचिव ईन्द्रजित मुखियाको संयोजकत्वमा खेलकुद समिति गठन भएको छ । बैठकले आगामी चैत १६ गते विर्तामोडमा कार्यक्रम आयोजना गरि एस.एल.शर्मा सिर्जनशील पत्रकारिता पुरस्कार र पार्वतीदेवी पत्रकारिता प्रोत्साहन पुरस्कार वितरण गर्ने तयारी पनि गरेको छ । पत्रकार महासंघ झापा शाखाले पत्रकार सहारा उपचार कोष र पत्रकारिता पुरस्कार अक्षयकोषको रकम बृद्धिका लागि विशेष योजना तयार गरेको छ ।
बैठकले लामो समयदेखि अस्वस्थ अग्रज पत्रकार अमृतलाल श्रेष्ठको उपचारार्थ सहयोग रकम प्रदान गर्ने निर्णय पनि गरेको छ । यस्तै अग्रज कानुन व्यावसायी नरेश बर्माको निधनप्रति श्रद्धाञ्जली अर्पण गर्दै परिजनमा समवेदना व्यक्त गरेको छ ।
त्यसैगरि सवारी दुर्घटनामा परि घाईते भएका शाखाका पूर्व कोषध्यक्ष कृष्ण मिश्र र शाखा सचिव सन्तोष आचार्यको शीघ्र स्वास्थ्य लाभको कामना गरेको समितिका सदस्य अनिलदेव राईले बताउनुभयो ।
नयाँअनलाइनसँग एप्समा पनि जोडिनुसक्नुहुनेछ । एन्ड्रइडको लागि यहाँ क्लिक गर्नुहोस् । त्यसैगरी हामीलाई फेसबुक, ट्वीटर र युट्युवमा पनि पच्छ्याउन सक्नुहुनेछ ।
