काठमाडौं, ११ चैत ।
राष्ट्रपति विद्यादेवी भण्डारी छिमेकी मुलुक भारत भ्रमणमा जाने पक्का भएको छ ।
राष्ट्रपति भण्डारी बैशाख ४ गते पाँच दिने भारत भ्रमणमा जाने पक्का भएको हो । प्रधानमन्त्री पुष्पकमल दाहाल प्रचण्ड चीन भ्रमण सकेर फर्केको उकसाताभित्रै राष्ट्रपतिले अर्को छिमेकी मुलुक भारत भ्रमण गर्ने विषयलाई नेपाली राजनीतिमा निक्कै चाखपूर्ण मानिएको छ ।
भण्डारीले बैशाख ५ गते भारतको राजधानी नयाँ दिल्लीमा हुने उच्चस्तरीय राजनीतिक भेटघाट गर्ने तय भएको परराष्ट्र मन्त्रालयले जनाएको छ । राष्ट्रपतिको आधिकारिक भ्रमण तालिका भने सार्वजनिक भइनसकेको बताइएको छ ।
पाँच दिने भ्रमणका क्रममा भण्डारीले वैशाख ६ गते बनारस हिन्दु विश्वविद्यालयको कार्यक्रममा सहभागि हुने तय भएको स्रोतले दावी गरेको छ । राष्ट्रपतिको भारत भ्रमणको क्रममा सामान्य खालका दुईपक्षीय समझदारीहरु हुनसक्ने अनुमान गरिएको छ ।
राष्ट्रपति भण्डारीले गर्ने यो नै पहिलो विदेश भ्रमण हुने राष्ट्रपति कार्यालयले जनाएको छ । करिव एक बर्ष अघि नै भारत भ्रमणको तयारी भए पनि भण्डारीको भारत भ्रमण अन्तिम समयमा स्थगित भएको थियो । राजनीतिक कारण देखाउदै तत्कालनीन केपी ओली नेतृत्वको सरकारले भ्रमण रद्द गरेको थियो ।
भारतीय राष्ट्रपति प्रणव मुखर्जीको विशेष निमन्त्रणमा त्यसतर्फ जान लाग्नुभएकी भण्डारीले भ्रमणका क्रममा भारतीय समकक्षी मुखर्जी, प्रधानमन्त्री नरेन्द्र मोदी, परराष्टमन्त्री सुष्मा स्वराज, गृहमन्त्री राजनाथ सिंह लगायतसँग भेटवार्ता गर्ने बताइएको छ । उहाँको यो भ्रमण राजकिय हुने परराष्ट्रका अधिकारीहरुले दावी गरेका छन् ।
नयाँअनलाइनसँग एप्समा पनि जोडिनुसक्नुहुनेछ । एन्ड्रइडको लागि यहाँ क्लिक गर्नुहोस् । त्यसैगरी हामीलाई फेसबुक, ट्वीटर र युट्युवमा पनि पच्छ्याउन सक्नुहुनेछ ।
