काठमाडौं, ९ चैत ।
प्रतिनिधिसभामा ३ प्रतिशत थ्रेसहोल्ड राख्ने गरी संसद्मा पेश भएको राजनीतिक दलसम्बन्धी बिधेयकविरुद्ध संघीय लोकतान्त्रिक मधेसी मोर्चा र साना दलहरु एकजुट भएका छन् । 
व्यवस्थापिका संसद्को बुधबार बसेको बैठकमा मधेसी मोर्चाले थ्रेसहोल्डको विरोध गर्दै संसद् बहिस्कार गरे लगत्तै संसद्मा प्रतिनिधित्व गर्ने सत्तापक्ष र प्रतिपक्षका साना दलहरुले पनि सो विधेयकको विरोधमा संसद् बैठक बहिस्कार गरेका हुन् । साना दलका सांसदहरुले यस विधेयक बारेको कारबाही अघि नबढाउन सभामुख ओनसरी घर्ती मगरलाई आग्रह गरेका छन् ।
बैठकमा साना दलको तर्फबाट बोल्दै मालेका सांसद सीपी मैनालीले चुनावमा थ्रेसहोल्ड राख्ने दुनियामा कहिँ नभएको भन्दै विरोध गर्नुभयो । मैनालीले भन्नुभयो –‘प्रधानमन्त्री र अन्य ठूला दलका नेताहरुले थ्रेसहोल्ड नराख्ने बचन दिए पनि राज्य व्यवस्था समितिबाट उल्टो बिधेयक पारित भएको छ । हामी यसको पक्षमा छैनौं ।’
राष्ट्रिय पार्टीको मान्यता पाउन ३ प्रतिशत मत र एक सिट प्रत्यक्ष जित्नुपर्ने व्यवस्था गरेर भोलि प्रत्यक्ष चुनाव नजित्ने दलले १० प्रतिशत मत ल्याउँदा पनि समानुपातिकबाट सांसद नपाउने अवस्था आएको माले महासचिवसमेत रहनुभएका मैनालीको भनाइ थियो ।
नेपाल मजदूर किसान पार्टीका सांसद प्रेम सुवालले यो बिधयेकले दुई वा तीन दलले मात्र राष्ट्रिय दलको मान्यता प्राप्त गर्ने अवस्था रहेको जिकिर गर्नुभयो । संविधानमा नलेखिएको ३ प्रतिशत र एक प्रत्यक्ष सिट जित्नैपर्ने प्रावधान कानुनमा ल्याउन खोजिएको उहाँको भनाइ थियो । संसद्मा प्रतिनिधित्व गर्ने मधेसी मोर्चासहित अन्य १९ दलका सांसदले थ्रेसहोल्डको विरोध गर्ने बताएका छन् ।
नयाँअनलाइनसँग एप्समा पनि जोडिनुसक्नुहुनेछ । एन्ड्रइडको लागि यहाँ क्लिक गर्नुहोस् । त्यसैगरी हामीलाई फेसबुक, ट्वीटर र युट्युवमा पनि पच्छ्याउन सक्नुहुनेछ ।
