काठमाडौं, २ चैत ।
संघीय गठबन्धनमा आवद्ध संयुक्त लोकतान्त्रिक मधेसी मोर्चाले वर्तमान सरकारलाई दिएको समर्थन फिर्ता लिएको जनाएको छ ।व्यवस्थापिका–संसद्को बुधबारको बैठकमा बोल्दै सांसद एवम् तराई मधेस सद्भावना पार्टीका अध्यष महेन्द्रराय यादवले वर्तमान सरकारलाई संयुक्त लोकतान्त्रिक मधेसी मोर्चासहितको गठबन्धनले दिएको समर्थन फिर्ता लिएको घोषणा गर्नुभएको हो । यादवले समर्थन फिर्ताबारेको औपचारिक जानकारी सभामुखलाई दिने बताउनुभएको छ  ।
प्रधानमन्त्री पुष्पकमल दाहाल प्रचण्डको नेतृत्वमा गठित काँग्रेस–माओवादी गठबन्धन सरकार गठनका बेला मोर्चासँग भएका तीनबुँदे सहमति कार्यान्वयन नभएकाले सहमति फिर्ता लिइएको यादवले स्पष्ट पार्नुभएको हो । उहाँले त्यसलगत्तै बुधबार को संसद् बैठकसमेत बहिष्कार गरिने घोषणा गर्नुभयो । सो घोषणासँगै संघीय समाजवादी फोरम नेपाल लगायत दलका सांसद बैठककक्षबाट बाहिरिएका थिए ।

मोर्चालाई फकाउने प्रमको असफल प्रयास

यसअघि बुधबार बिहान नै प्रधानमन्त्री पुष्पकमल दाहाल ‘प्रचण्ड’ले मधेसी मोर्चाका नेताहरुलाई फकाउन सिंहदरबारमा छलफल गर्नुभएको थियो । तर, मोर्चालाई फकाउने प्रधानमन्त्री प्रचण्डको प्रयास असफल भएको छ ।
उक्त भेटघाटमा प्रधानमन्त्री प्रचण्डले प्रेदेश सीमांकनलाई आयोगमार्फत टुंगो लगाउन प्रस्ताव गर्दै निर्वाचन प्रक्रियामा आउन मोर्चाका नेताहरुलाई आग्रह गर्नुभएको थियो । मोर्चा नेताहरुले भने सीमांकनको विषयलाई आयोगबाट टुंग्याउने प्रस्ताव सकारात्मक भए पनि स्थानीय तहको निर्वाचन बारे आपत्ति जनाएका थिए ।
प्रचण्डले सरकारलाई प्राप्त मोर्चाको समर्थन फिर्ता नलिन आग्रह गरे पनि मोर्चाले भने बुधबार संसद्मै सो बारे आधिकारिक धारणा राखेको हो । मोर्चाले भने वर्तमान सरकार मधेसीमाथि दमनको नीति लिएर अघि बढेको, संविधान संशोधन रोकेर स्थानीय तह निर्वाचनमा लागेको अरोप लगाउँदै आएको छ ।
तर, संसद् संख्याको गणितलाई हेर्ने हो भने राप्रपालाई सरकारमा सहभागी गराएसँगै प्रचण्ड नेतृत्वको गठबन्धन सरकार अल्पमतमा नपर्ने पक्का भइसकेको छ । विजयकुमार गच्छदार नेतृत्वको दल मधेसी जनअधिकार फोरम लोकतान्त्रिकलाई सरकारमा सहभागी गराउन प्रचण्ड थप राजनीतिक कसरतमा हुनुहुन्छ । गच्छचदारलाई समेत सरकारमा समावेश गर्न सके गठबन्धन सरकार तुलनात्मक रूपमा बलियो हुने पक्का छ । यसो गर्न सके मधेसमा पनि स्थानीय तह निर्वाचनको सकारात्मक प्रभाव पर्ने सरकारको बुझाइ छ ।