काठमाडौं, १ चैत ।
प्रधानमन्त्री पुष्पकमल दाहाल ‘प्रचण्ड’ आगामी चैत १० गते चीन भ्रमणमा जाने हुनुभएको छ ।
दोस्रो पटक मुलुकको प्रधानमन्त्री बनेपछिको प्रचण्डको यो पहिलो चीन भ्रमण हुनेछ । नेकपा माओवादी केन्द्रका अध्यक्ष समेत रहनुभएका प्रचण्ड चनिको बोआओ फोरममा भाग लिन चीन जाँदैहुनुहुन्छ ।
प्रम प्रचण्डको चीन भ्रमणबारे नेपालस्थित चिनियाँ दूतावासका अधिकारीहरुले सोमबार बिहानै उहाँलाई भेटेर चीन भ्रमणको मिति टुंगो लगाएका बालुवाटार स्रोतले जनाएको छ । भ्रमणको मिति मार्च २३ र २४ का लागि तय भएको परराष्ट्र स्रोतले जानकारी दिएको छ ।
यसअघि भारतको गोवामा सम्पन्न ब्रिक्स राष्ट्रहरुको सम्मेलनमा पनि प्रधानमन्त्री प्रचण्ड र चिनियाँ राष्ट्रपति सी जिनपिङबीच वार्ता भएको थियो । भेटका क्रममा प्रचण्डले चिनियाँ राष्ट्रपति सिलाई नेपाल भ्रमणका लागि औपचारिक निम्तो दिनुभएको थियो ।
चिनियाँ राष्ट्रपतिले पनि औपचारिक नेपालको भ्रमण गर्ने चर्चा चल्दै आएको छ । तर, अहिलेसम्म भ्रमण निश्चित भएको छैन ।
समाचार स्रोतहरुका अनुसार बोआओ फोरमसँगै प्रधानमन्त्री प्रचण्डले चीनको राजधानी बेइजिङ भ्रमण गर्ने गृहकार्य पनि भइरहेको छ । त्यहाँ प्रचण्डले राष्ट्रपति सिलाई भेट्ने र नेपाल–चीनबीच द्विपक्षीय सम्झौताहरु गर्ने पनि कुटनीतिक प्रयास भइरहेको बताइएको छ ।
भ्रमणका दौरान केरुङ–काठमाडौं–लुम्बिनी रेलमार्गको डीपीआर, इन्धन भण्डारण, व्यापार तथा पारवहन सन्धीको प्रोटोकलमा हस्ताक्षर लगायतमा नेपाली पक्षले गृहकार्य गरिरहेको छ ।
नयाँअनलाइनसँग एप्समा पनि जोडिनुसक्नुहुनेछ । एन्ड्रइडको लागि यहाँ क्लिक गर्नुहोस् । त्यसैगरी हामीलाई फेसबुक, ट्वीटर र युट्युवमा पनि पच्छ्याउन सक्नुहुनेछ ।
