देशभरको जनजीवन प्रभावित

काठमाडौं, २७ फागुन ।

गत सोमबार सप्तरीको राजविराजमा भएको गोली काण्डविरुद्ध शुक्रबार संघीय गठबन्धनले आयोजना गरेको नेपाल बन्दका क्रममा व्यापक धरपकड भएको छ । राजधानीलगायत देशभरका विभिन्न स्थानहरुमा बन्दको प्रभाव परेको छ ।
शुक्रबार बिहानैदेखि प्रहरीले राजधानीभित्रका विभिन्न स्थानहरुबाट बन्द सफल पार्न उत्रिएका गठबन्धन आवद्ध विभिन्न दलका नेता कार्यकर्ताहरुलाई पक्राउ गरेको हो । प्रहरीले बिहानै संघीय समाजवादी फोरमका सह–अध्यक्ष राजेन्द्र श्रेष्ठ, उपाध्यक्ष हेमराज राई, महासचिव रणध्वज कन्दङ्वा, सचिव अजम्बर काङमाङ राईलगायत नेता कार्यकर्ताहरुलाई पक्राउ गरेर हिरासतमा राखेको छ । सो क्रममा समाजवादी युवा फोरमका अध्यक्ष सुनिल चौधरीसहित समाजवादी ट्रेड युनियनका सचिव यज्ञ राई, संघीय तामाङ संघका संयोजक जय गोलेलगायत पक्राउ परेका हुन् ।

त्यस्तै राजधानीको ललितपुरबाट शुक्रबार बिहान नै लिम्बुवानका केन्द्रीय नेताहरु दुर्गा ओख्राबो, दीपा आदाङ्मासासहित १० बढी नेता कार्यकर्तालाई प्रहरी पक्राउ गरेको खबर छ ।
राजधानीमा छिटपुट यातायातका साधन चले पनि अन्यत्र भने ठप्पै छन् । बन्दकर्ताले एम्बुलेन्स, बारुण यन्त्र, कुटनीतिक नियोगका सवारी, मलामी र जन्ती बोकेका गाडी र प्रेसका सवारी साधनलाई भने रोकतोक नगरेको जनाएको छ ।
प्रहरीले झापाको झापाको काकरभिट्टाबाट संघीय समाजवादीका चार जना कार्यकर्ताहरुलाई विहान प्रहरीले पक्राउ गरी इलाका प्रहरी कार्यालय काकरभिट्टामा राखिएको थियो । हाल उनीहरुसबैलाई छाडिएको ससफो झापा अध्यक्ष धिनेर लावतीले जानकारी दिनुभयो । बजार बन्द गर्ने क्रममा प्रहरीले संघीय समाजवादीका केन्द्रीय सदस्य धनप्रसाद गुरुङ, मेचीनगर अध्यक्ष नारायण गुरुङ, जिल्ला सल्लाकार सदस्य अकल गुरुङ, क्षेत्रिय अध्यक्ष तिलकचन गुरुङलाई पक्राउ गरेको थियो ।
बन्द सफल पार्न गठबन्धन आवद्ध विभिन्न दलका नेता कार्यकर्ता बिहानैदेखि सडकमा झण्डासहित उपस्थित छन् । बन्दका क्रममा हालसम्म कुनै अप्रिय घटना नभएको बताइएको छ ।

बन्दका कारण देशभर लामो तथा छोटो दुरीका सवारी साधन चलेका छैनन् भने बजार, उद्योगधन्दा र विद्यालयहरु बन्द छन् । यसैबीच शनिबार नेपाल कम्युनिष्ट पार्टी (विप्लव समूह)ले नेपाल बन्दको आह्वान गरेको छ । विप्लवले विज्ञप्ति जारी गरेर कञ्चनपुरमा भएको गोली काण्डको विरोधमा नेपाल बन्द आह्वान गरेको हो ।
नेपाल–भारत सीमानामा कल्भर्ट बनाउने निहुमा दुई पक्षीय झडप हुँदा भारतीय सुरक्षा दस्ता एसएसबीले प्रहार गरेको गोली लागेर गोविन्द गौतमको विहीबार मृत्यु भएपछि विप्लव समूहले शनिबार बन्द आह्वान गरेको हो । विप्लव समूहले शुक्रबार नै सीमा क्षेत्रहरुमा भारतीय प्रधानमन्त्री नरेन्द्र मोदीको पुत्ला दहन गर्ने कार्यक्रम तय गरेको स्रोत जनाएको छ ।