कमल थापा र दिलनाथ गिरी मन्त्री हुँदै
काठमाडौं, २६ फागुन ।
मधेसी मोर्चाले सरकारलाई दिएको समर्थन फिर्ता लिने भन्दै सात दिने अल्टिमेटम दिएपछि प्रधानमन्त्री पुष्पकमल दाहाल प्राण्डले सरकार टिकाउन राप्रपालाई सरकारमा सहभागी गराउने तयारी गर्नुभएको छ ।
राप्रपा अध्यक्ष कमल थापालाई उपप्रधानमन्त्री एवम् स्थानीय विकास मन्त्री बनाउने पक्कापक्की भएको छ । त्यस्तै राप्रपाबाट दिलनाथ गिरीले पनि पर्यटन मन्त्रालयको जिम्मेवारी पाउने पक्कापक्की भएको छ । नवनियुक्त दुवै मन्त्रीको सपथ बिहीबार साँझ ६ बजे हुने पक्का भएको छ ।
मधेसी मोर्चाले स्थानीय तहको निर्वाचन मिति स्थगित गर्नुपर्ने भन्दै समर्थन फिर्ताको चेतावनी दिएलगत्तै काँग्रेस–माओवादी गठबन्धन सरकार सत्ता टिकाउन प्रचण्डले नयाँ बाटो खोज्नुभएको बालुवाटार स्रोतले जनाएको छ ।
हाल स्थानीय र पर्यटन गरी दुवै मन्त्रालय माओवादी केन्द्रको भागमा छ । आफ्ना दुवै मन्त्रीलाई फिर्ता बोलाएर प्रचण्डले राप्रपालाई सरकारमा अँटाउने उपाय निकाल्नुभएको बुझिएको छ । राप्रपा सरकारमा सामेल भए मोर्चाले समर्थन फिर्ता लिए पनि गठबन्धन सरकारलाई असर नपर्ने बताइएको छ ।
यसअघि प्रचण्डले मधेसी जनअधिकार फोरम लोकतान्त्रिकलाई पनि सरकारमा सामेल गर्ने रणनीति बनाएको थियो । तर, राजविराज गोली काण्डपछि फोरम लोकतान्त्रिकले तत्कालै सरकारमा जाँदा मधेसमा विरोध हुने राजनीतिक त्रासका कारण सरकारमा सामेल हुन नचाहेको स्रोतको भनाइ छ ।
नयाँअनलाइनसँग एप्समा पनि जोडिनुसक्नुहुनेछ । एन्ड्रइडको लागि यहाँ क्लिक गर्नुहोस् । त्यसैगरी हामीलाई फेसबुक, ट्वीटर र युट्युवमा पनि पच्छ्याउन सक्नुहुनेछ ।
