भक्तपुर २५, फागुन ।

संघीय समाजवादी फोरम, नेपालका अध्यक्ष उपेन्द्र यादवले मधेसी मोर्चाबाट सरकारमा दिइएको समर्थन फिर्ता लिइएको जानकारी दिनुभएको छ ।
बुधबार बिहान बसेको मोर्चाको बैठकले पुष्पकमल दाहाल प्रचण्ड नेतृत्वको गठबन्धन सरकारलाई दिइएको समर्थन फिर्ता लिइएको स्पष्ट पार्नुभएको हो । त्यसअघि प्रधानमन्त्री प्रचण्डसँग मोर्चाका माग सम्बन्धमा कुराकानी गर्दा प्रधानमन्त्रीले माग पूरा गराउन नसक्ने बताएपछि मोर्चा यस्तो निर्णयमा पुगेको अध्यक्ष यादवको भनाई थियो । उहाँले भन्नुभयो –‘आजबाट सरकार अल्पमतमा परेको छ । हामीले एक हप्ताको अल्टिमेटम दिएर सरकारलाई दिएको समर्थत फिर्ता लिएका हौं ।’
प्रचण्ड सरकार नै अल्पमतमा परिसकेकाले वर्तमान सरकारले घोषणा गरेको स्थानीय तहको निर्वाचन नहुने यादवले जिकिर गर्नुभयो । संविधान निर्माणमा भएको त्रुटि नसच्याएसम्म देशमा शान्ति स्थापना नहुने भन्दै उहाँले भन्नुभयो –‘निर्वाचन गर्ने भनिए तापनि यो भ्रामक कुरा हो ।’
केन्द्र र प्रदेशको निर्वाचन पश्चात मात्र स्थानीय तहको निर्वाचन हुन्छ भन्दै उहाँले भन्नुभयो –‘मधेस बिना नै निर्वाचन गर्छाैं भन्नु गैरजिम्मेवार कुरा हो ।’

‘सप्तरी घटना तीन दल र सुरक्षा निकायको योजनामा’

यसैबीच यादवले तीन दल र सुरक्षा निकायले योजनाबद्व ढंगले सप्तरी घटना गराएको गम्भीर आरोप लगाउनुभएको छ ।
नेपाली कांग्रेस, नेकपा एमाले, नेकपा माओवादी केन्द्र र सुरक्षा निकायले नियोजित रूपमा सप्तरी घटना गराएको उहाँले आरोप लगाउनुभएको हो । बुधबार रफत सञ्चार क्लवसँगको साक्षात्कार अध्यक्ष यादवले प्रधानमन्त्री, गृह मन्त्री र एमालेका नेताहरुले पहिले नै योजना बनाएर सप्तरी घटना घटाएको भन्दै लोकतन्त्रमा एमालेले आमसभा गर्न पाउने र त्यसको विरोध अरुले पनि गर्न पाउने भए पनि मधेसी मोर्चाका कार्यकर्तालाई छानी छानी टाउकोमा गोली हान्नु योजनाबद्व रहेको खुलासा गर्नुभयो ।
संघीय गठबन्धनको संयोजक समेत रहनुभएका यादवले भन्नुभयो –‘सप्तरी घटनामा टाउको र छातीमा मधेसी मोर्चाका कार्यकर्तालाई गोली लाग्नु र प्रहरी तथा एमालेका एक जना पनि कार्यकर्ता घाइते नहुनेले घटना सुनियोजित भएको पुष्टि हुन्छ ।’
एमालेले आफना शीर्ष नेताको हप्ता प्रयास भएको भन्ने प्रचार भ्रामक र घटनालाई अन्तै मोड्ने प्रयास भएको बताउँदै उहाँले सुनियोजित रूपमा घटाइएको घटनाको जति निन्दा र विरोध गरेपनि कम हुने जिकिर गर्नुभयो ।