सप्तरी गोली काण्डमा मृत्यु हुनेको संख्या चार पुग्यो
मोर्चाको आकस्मिक बैठक जारी
एमालेको मेची–महाकाली अभियान तीन दिनलाई स्थगित

• कमन देवान
• झापा, २३ फागुन । 

एमालेको मेची–महाकाली अभियानको प्रतिवाद गर्ने क्रममा प्रहरीले चलाएको गोली गालेर चार जना मधेसी मोर्चाका कार्यकर्ता मारिएका छन् ।
राजविराज गोली काण्डमा मृत्यु हुनेमा सप्तरीका रञ्जन मेहता, दिगम्बर यादव, पिताम्बर मण्डल र आनन्द साह रहेका छन् । उनीहरुको टाउको, छाती, पेटमा गोली लागेको हो ।
गोली लागेका मेहताको गजेन्द्र नारायण अञ्चल अस्पताल राजविराजमा उपचारका क्रममा मृत्यु भएको हो भने अन्यलाई उपचारका लागि धरान लैजाने क्रममा बाटोमै मृत्यु भएको बताइएको छ ।
यसअघि सप्तरीका प्रमुख जिल्ला अधिकारी उद्धव तिमल्सिनाले आफूलाई एक जनाको मृत्यु भएको खबर आएको बताउनुभएको थियो । प्रजिअ तिम्सिनाले एमाले सभा कुनै पनि हालतमा सफल पार्न उच्च सुरक्षा सतर्कता अपनाइने भन्दै मोर्चाले विरोध गरे बल प्रयोग गरिने चेतावनी दिनुभएको विभिन्न सञ्चार माध्यमहरुबाट सार्वजनिक भएको थियो । राजविराज गोली काण्डपछि तिम्सिनाको मोबाइल अफ भएको छ । मोर्चाले भने एमाले सभा गर्न नदिने भन्दै आन्दोलन घोषणा गरेको थियो ।
पूर्व क्षेत्रीय प्रहरी कार्यालयका डिआइजी रमेश भट्टराईले भने मोर्चा कार्यकर्ताले एमाले सभा बिथोल्न पेट्रोल बम प्रहार गरेपछि गोली चलाइएको जानकारी दिनुभएको छ ।
यसअघि सोमबार दिनभर एमाले सभा बिथोल्न सहभागी मधेसी मोर्चाका कार्यकर्ता र प्रहरीबीच पटक पटक भीडन्त भएको थियो । राजविराजस्थित औद्योगिक क्षेत्रमा जारी एमाले सभा गोली काण्डपछि बिथोलिएको थियो ।
राजविराज गोली काण्डपछि सुरक्षास्थितिलाई मध्यनजर गर्दै प्रहरीले एमाले अध्यक्ष केपी शर्मा ओलीसहित एमाले नेताहरुलाई सप्तरीको बरमझियास्थित सशस्त्र प्रहरी बलको गणमा राखेको बताइएको छ ।

मोर्चाको आकस्मिक बैठक

यसैबीच राजविराज गोली काण्ड लगत्तै संयुक्त लोकतान्त्रिक मधेसी मोर्चाको आपतकालीन बैठक काठमाडौंमा बस्दैछ ।
राष्ट्रिय मधेस समाजवादी पार्टीका महासचिव केशव झाले मोर्चाको आपतकालीन बैठक संघीय समाजवादी फोरमको कार्यालय तीनकुनेमा जारी रहेको सामाजिक सञ्जाल फेसबुकबाट जानकारी दिनुभएको छ ।
मोर्चाले राजविराज गोली काण्डको समीक्षा, सरकारलाई दिइएको समर्थन फिर्ता र आन्दोलन चर्काउने बारे छलफल गरिरहेको स्रोतले जनाएको छ ।
गोली काण्डमा गम्भीर घाइते भएका आठ जना प्रदर्शनकारीलाई नाइटभिजन हेलिकोप्टरबाट काठमाडौं ल्याउने तयारी भइरहेको मोर्चा निकट स्रोतले जनाएको छ ।
गोली लागेका मध्ये तीन जनाको स्वास्थ्यस्थिति गम्भीर रहेको बताइएको छ । मोर्चाले प्रहरीको गोली लागेर २० जना भन्दा बढी घाइते भएको बताए पनि प्रहरी प्रशासनले भने यस बारे केही जनाएको छैन । प्रहरीले सशस्त्र र नेपाल प्रहरीका दुई दर्जन बढी घाइते भएको जानकारी दिएको छ ।

एमाले अभियान तीन दिनलाई स्थगित

यसैबीच राजविराज गोली काण्डपछि एमालेविरुद्ध मधेसी मोर्चाको आक्रोश बढ्ने विश्लेषण गर्दै एमालेले थालेको मेची–महाकाली अभियान तीन दिनका लागि स्थगित गर्ने निर्णय गरेको छ ।
सशस्त्र प्रहरी गणभित्र उच्च सुरक्षा पहरा लिएर बसेको एमालेको आकस्मिक बैठकले अयिभान स्थगन गर्ने निर्णय गरेको हो ।