मधेसी मोर्चाले एमाले सभा विथोलेको आरोप

काठमाडौं, फागुन २३ ।
सप्तरीको राजविराजमा प्रहरीको गोली लागेर दुई जना प्रदर्शनकारीको मृत्यु भएको छ । नेकपा एमालेको जारी मेची–महाकाली अभियानको सुरक्षार्थ खटिएको प्रहरीले आन्दोलनमा उत्रिएका मधेसी मोर्चाका कार्यकर्तामाथि गोली प्रहार गदा १८ वर्षीय सन्जन मेहताको मृत्यु भएको हो ।  प्रहरीको गोली लागेर गम्भीर घाइते भएका मलेठ–२ का मेहताको उपचारको क्रममा मृत्यु भएको बताइएको छ । मृत्यु भएका अर्का एक जनाको नाम खुल्न बाँकी रहेको बताइएको छ ।  प्रहरीको गोली लागेर गम्भीर घाइते भएका थप दुई जनाको स्थिति गम्भीर रहेको मधेसी बताइएको छ । तर, सुरक्षा प्रशासनले भने घटनाबारे आधिारिक जानकारी दिन मानेको छैन ।
मोर्चाले एमाले र अध्यक्ष केपी ओली मधेस विरोधी भएको भन्दै मधेसमा अभियान गर्न नदिने घोषणा गरेको थियो । मोर्चाको चेतावनीविरुद्ध एमाले अभियान सञ्चालन हुने भएपछि मोर्चा कार्यकर्ताले प्रतिवाद गरेका थिए ।
प्रहरीको गोली लागेर दुई जना प्रदर्शनकारीको मृत्यु भएलगत्तै एमाले सभा बिथोलिएको थियो । प्रहरीले एमाले अध्यक्ष ओली, वरिष्ठ नेताहरु झलनाथ खनाल, माधवकुमार नेपाललगायत नेता टोलीलाई राजविराजबाट भगाएर पूर्व–पश्चिम राजमार्गको रूपनी पुर्याएको थियो ।
राजविराजस्थित औद्योगिक क्षेत्रभित्र आयोजित एमाले सभामा अध्यक्ष केपी ओलीले  सम्बोधन गरिरहँदा मोर्चाका कार्यकर्ताले घेराबन्दीको प्रयास गरेका थिए । एमालेको सभा चलिरहँदा मोर्चाको कार्यकर्ताले सभास्थल घेराउ गरेपछि भीडलाई नियन्त्रण गर्न प्रहरीले गोली र अश्रुग्यास प्रहार गरेको थियो । सभा सुरु हुनु अघि पनि प्रहरी र मोर्चा कार्यकर्ता बीच झडप हुँदा एक दर्जन बढी मोर्चाका कार्यकर्ता घाइते भएका थिए ।
एमालेको कार्यक्रम सकिने बेलामा प्रदर्शनकारीले एमाले कार्यकर्ताको मोटरसाइकल जलाएका थिए भने एक दर्जन गाडीमा तोडफोड गरेका थिए । एमाले शीर्ष नेताहरुको टोली कञ्चनपुरतिर लाग्न खोज्दा मोर्चाका कार्यकर्ताले ठाउँ–ठाउँमा अवरोध गरेका थिए । उनीहरुलाई हटाउने क्रममा प्रहरी र मधेसी मोर्चाका कार्यकर्ताबीच लखेटालखेट भएको थियो । प्रहरीले सोमबार दिउँसोभर सप्तरीका विभिन्न गाउँहरुबाट विरोधमा उत्रिएका मधेसी कार्यकर्तालाई खेतखेतमा रोकेर राखेका थिए ।