दमक, २१ फागुन ।
आफ्नो हक अधिकारका लागि नेपालका मुलवासी मंगोलहरु एक हुनुपर्नेमा मंगोल नेशनल अर्गानाइजेशनका शीर्ष नेताहरुले जोड दिएका छन् । 
शनिबार झापाको दमकमा आयोजित १२ औं झापा जिल्ला अधिवेशनमा बोल्दै सम्बद्ध नेताहरुले यस्तो बताएका हुन् । अधिवेशनलाई सम्बोधन गर्दै अर्गानाइजेशनका कार्यबाहक अध्यक्ष बुद्धलाल मेचेले अहिन्दु मुलवासी मंगोलहरुको भूमिमा खस आर्यले खोसेको आरोप लगाउनुभयो । मेचेले भन्नुभयो –‘हामी मंगोल जातिहरुलाई हाम्रै भूमिमा शोषण र दमन गरिएको छ ।’
कार्यक्रममा केन्द्रका शीर्ष नेताहरु शान्तिलाल धिमाल, शक्ति चाम्लिङ, दिलिप धिमाल, वीरलाल वालाल, दिनेश बान्तवा लगायतले मंगोल एकताले मात्रै नेपालमा वास्तविक उत्पीडनको अन्त्य हुने बताएका थिए ।
अर्गानाईजेशनका झापा जिल्ला अध्यक्ष श्याम लिम्बूको सभापतित्वमा भएको कार्यक्रममा अगानाईजेशनमा विशेष योगदान दिने छ जनालाई कदरपत्र प्रदान गरिएको थियो ।
अधिवेशनको बन्दसत्रबाट पुनः श्याम लिम्बूको अध्यक्षतामा २५ सदस्यीय जिल्ला समिति गठन भएको बताइको छ । कार्यक्रममा मंगोल जातिलाई सचेत गर्ने खालका नृत्य, गीत, कविता समेत प्रस्तुत गरिएको थियो ।
नयाँअनलाइनसँग एप्समा पनि जोडिनुसक्नुहुनेछ । एन्ड्रइडको लागि यहाँ क्लिक गर्नुहोस् । त्यसैगरी हामीलाई फेसबुक, ट्वीटर र युट्युवमा पनि पच्छ्याउन सक्नुहुनेछ ।
