विर्तामोड, १५ फागुन । सरकारले घोषणाको रहर पूरा गर्न मात्रै तोकेको स्थानीय तहको निर्वाचन नहुने संघीय समाजवादी फोरमका अध्यक्ष उपेन्द्र यादवले बताउनुभएको छ ।
आइतबार झापाको विर्तामोडमा संघीय प्रेस फोरमले आयोजना गरेको पत्रकार सम्मेलनमा बोल्दै अध्यक्ष यादवले प्राविधिक रूपमै असम्भव चुनाव घोषणा गरेर प्रधानमन्त्री पुष्पकमल दाहाल प्रचण्डले रहर मात्रै पूरा गरेको बताउनुभयो ।
संघीय गठबन्धनको संयोजक समेत रहनुभएका यादवले भन्नुभयो –‘संघीय संसद्, प्रदेश संसद् निर्वाचन सकेर मात्रै स्थानीय तहको निर्वाचन सम्भव छ । संरचना नै नबनेको स्थानीय तह निर्वाचन बक्बास हो ।’
मधेसी मोर्चाले सरकारलाई दिएको समर्थन फिर्ता लिइसकेकाले अब प्रचण्ड सरकार केही दिनमै ढल्ने भन्दै यादवले भन्नुभयो –‘हामीले मधेसी मोर्चाका तर्फबाट सरकारलाई दिइएको समर्थान फिर्ता लिइसक्यौं, अब प्रकृया अघि बढाउंछौ ।’
चुनावमा हार हुने डरले चुनाव बहिस्कार गर्न लागेको हो ? भन्ने पत्रकारहरुको जिज्ञासामा यादवले भन्नुभयो –‘चुनावमा हार जित हुन्छ । जित्नेले जनभावनाको सम्मन गरेर सत्ता चलाउने हो । तर, अहिले घोषणा गरिएको चुनावको औचित्य नै छैन । त्यसैले औचित्यहिन चुनाव बारे धेरै नबोलौं ।’
यादवले प्रदेश सरकार बनेपछि उसैले आफ्नो जिम्मेवारी अनुसार स्थानीय तहको संरचना निर्माण गरेर चुनाव गराउने जिकिर गर्नुभयो । उहाँले संविधान संशोधनका माध्यमबाट संविधानका त्रुटि सच्याउन सरकार इमानदार नभएको आरोप लागाउनुभयो ।
राज्यको सबै भन्दा जिम्मेवार र संवेदनशील अङ्ग न्यायपालिकामा राजनीतिक व्यक्तित्वहरुलाई न्यायाधीश नियुक्ति गर्ने, कुटनीतिक नियोगका लागि अयोग्य व्यक्तिहरुलाई राजनीतिक भागवण्डाका आधारमा राजदूत सिफारिस गरेको लगायतका गतिविधिले वर्तमान सरकार आफैले सत्तामा बसिरहने नैतिकता गुमाएको यादवको आरोप थियो ।
पत्रकार सम्मेलनमा यादवसहित ससफो नेपालका केन्द्रीय उपाध्यक्ष रकम चेम्जोङ, लिम्बुवान प्रदेश अध्यक्ष आरसी तुम्बा, उपाध्यक्षहरु देवेन्द्र राई र विश्वदीप लिङ्देनलगायत सहभागी हुनुहुन्थ्यो । संघीय प्रेस फोरम झापाका अध्यक्ष देशराज नेम्बाङको अध्यक्षतामा भएको पत्रकार सम्मेलनमा संगठनका उपमहासचिव कमन देवानले सहजीकरण गर्नुभएको थियो ।