- फागुन ९ निर्वाचन हुने
दमक, फागुन ७ ।
नेपाल पत्रकार महासंघ झापा शाखाको १२औं जिल्ला अधिवेशन तथा निर्वाचन दुई दिन पछि सरेको छ ।
काठमाडौंस्थित महासंघको केन्द्रीय कार्यालयमा प्रेस युनियनले सदस्यता लगायतका विषयमा असन्तुष्टि राख्दै केही दिनयता तालाबान्दी गरेकाले शुक्रबारमात्र सहमति हुँदा निर्वाचन कार्यतालिका सरेको नेपाल पत्रकार महासंघका अध्यक्ष डाक्टर महेन्द्र विष्टले जानकारी दिनुभयो । शुक्रबार महासंघ र युनियनका वार्ता टोलीबीच दुई वुँदे सहमति गरी महासंघको जारी अधिवेशन सम्पन्न गर्ने बारे सहमति भएको युनियन अध्यक्ष वद्री सिग्देलले स्पष्ट पार्नुभयो । 
महासंघ केन्द्रीय कार्यालयमा तालाबन्दी भएपछि जिल्लागत सदस्यता विवरण, निर्वाचनमा खटिने केन्द्रीय प्रतिनिधि तोक्ने लगायतका विषयमा अन्याृलता छाएको थियो । झापामा बिगत दुई दिनदेखि मनोनयन दर्ता कार्य हुने भनिए पनि महासंघको केन्द्रको विवादका कारण सम्पन्न हुन सकेन ।
यसैबीच महासंघ झापाले शुक्रबार सूचना जारी गरेर फागुन ७ गते शनिबार हुने भनिएको अधिवेशन र निर्वाचन सारेर फागुन ९ गते सोमबार बिहान ८ बजेबाट गर्ने तय गरेको छ । चारपानेस्थित टाइमस्क्वायर पार्टी प्यालेसमा हुने १२औं अधिवेशन र निर्वाचनका लागि तयारी थालिएको महासंघ झापाका अध्यक्ष भीम नेम्बाङले जानकारी दिनुभयो ।
झापा शाखामा महासंघको आगामी कार्यकालका लागि कार्य 
समितितर्फ सात पदाधिकारी, खुल्लातर्फ आठ जना कार्य समिति सदस्य र आदिवासी जनजाति, मधेसी, महिला र दलित कोटातर्फ गरी चार जना जम्मा १९ पदका लागि निर्वाचन हुने छ ।
त्यस्तै प्रदेश पार्षदका लागि ३५ जनालाई अधिवेशनले निर्वाचित गर्ने छ भने सात महिलासहित २७ जना केन्द्रीय पार्षदका लागि निर्वाचन हुने छ । झापामा कूल मत संख्या दुई सय ७७ रहेका छन् भने विभिन्न पदका लागि ८१ जना चुनिने छन् ।
हालसम्म स्वतन्त्रसहित विभिन्न १० वटा संगठनहरुबीच कार्यगत एकता गरेर व्यवसायिक पत्रकारहरुको संयुक्त समावेशी प्यानल र प्रेस चौतारीले एकल प्यानलमार्फत सबै पदहरुमा उम्मेद्वारी दिने आधिकारिक घोषणा गरेका छन् । समावेशी प्यानलतर्फबाट तारामणि सापकोटाको नेतृत्वमा उम्मेद्वारी घोषणा भएको हो भने चौतारीतर्फबाट गोपाल काफ्लेको नेतृत्वमा उम्मेद्वारी घोषणा गरिएको हो ।
त्यस्तै स्वतन्त्रतर्फबाट पत्रकार विष्णु पौडेलले सचिव पदमा उम्मेद्वारी दिने जानकारीमा आएको छ भने समावेशी कोषाध्यक्षमा सचितानन्द सुब्बा र कोषाध्यक्षमा अनिल ढुङ्गानाको उम्मेदवारी आउने चर्चा छ । यद्यपि, मनोनयन दर्ता सुरु नएकाले कुन कुन पदमा कति जनाले उम्मेद्वारी दिने भन्ने बारे यकिन भइसकेको छैन ।
नयाँअनलाइनसँग एप्समा पनि जोडिनुसक्नुहुनेछ । एन्ड्रइडको लागि यहाँ क्लिक गर्नुहोस् । त्यसैगरी हामीलाई फेसबुक, ट्वीटर र युट्युवमा पनि पच्छ्याउन सक्नुहुनेछ ।
