- ठूला तीन दल पेलेरै निर्वाचन गर्ने तयारीमा
चेतन आङथुपो
दमक, फागुन ४ ।
प्रमुख तीन ठूला राजनीतिक दलका शीर्ष नेताबीच पेलेरै स्वतन्त्र विद्यार्थी युनियनको निर्वाचन गर्ने सहमति बनेको केही समय नबित्दै झापाका विभिन्न छ वटा क्याम्पसहरुमा आन्दोलनरत विद्यार्थी संगठनहरुले स्ववियु निर्वाचन कार्यातालिका प्रभावित हुनेगरी तालाबन्दी गरेका छन् ।
बुधबार झापाको मेची बहुमुखी क्याम्पस, काँकडभिट्टास्थित काँकडभिट्टा बहुमुखी क्याम्पस, धुलाबारी बहुमुखी क्याम्पस, भद्रपुरको मेची बहुमुखी क्याम्पस, चारआलीको त्रीदेव बहुमुखी क्याम्पस, बिर्तामोडको कनकाई आदर्श आवाशीय क्याम्पस र देवी क्याम्पसमा संघीय विद्यार्थी गठबन्धनले तालाबन्दी गरेको हो ।
पूर्ण स्ववियु निर्वाचन प्रणाली लगायत विभिन्न माग गर्दै केही समययता आन्दोलनरत विद्यार्थी संगठनहरुले त्रिभुवन विश्वविद्यालयले आफ्ना माग पूरा गर्न बेवास्था गरेको भन्दै स्ववियु निर्वाचन कार्यतालिका अनुसार प्रक्रिया अघि बढेका क्याम्पसहरुमा तालाबन्दी गरेको समाजवादी विद्यार्थी फोरमका केन्द्रीय सदस्य योबाहाङ तुम्बाहाम्फेले जानकारी दिनुभयो ।
बुधबार बिहान प्रधानमन्त्री निवास बालुवाटारमा बसेको तीन दलका शीर्ष नेताबीचको बैठकले स्ववियु निर्वाचन पेलेर गर्ने निर्णय गरेको बारे विभिन्न सञ्चार माध्यमहरुबाट समाचार सार्वजनिक भएपछि आन्दोलनरत विद्यार्थी संगठनहरुले तालाबन्दी कार्यलाई तीव्रता दिएको बताइएको छ । यसअघि दमक बहुमुखी क्याम्पसमा विद्यार्थी संगठनहरुले क्याम्पस प्रमुख र निर्वाचन समितिको कार्यालयमा तालाबन्दी गरेका थिए ।
तीन दलका शीर्ष नेताबीच स्ववियु निर्वाचनबारे सहमति भएलगत्तै दमक क्याम्पसमा लगाइएको ताला फोडिएको भन्दै आन्दोलनरत विद्यार्थी संगठनहरुले विज्ञप्ति जारी गरेर विरोध गरेको छ । उनीहरुले शान्तिपूर्ण विद्यार्थी आन्दोलनलाई उत्तेजित नपार्न आग्रह गरेका छन् ।
बुधबारदेखि लिम्बुवान जन्य दुई विद्यार्थी संगठन, समाजवादी विद्यार्थी फोरम, जनमुक्ति निकट नेपाल विद्यार्थी मोर्चा, किरात राई विद्यार्थी संघ र लिम्बू विद्यार्थी मञ्चले संयुक्त आन्दोलन थालेको मञ्चका उपाध्यक्ष अभिषेक माबोले जानकारी दिनुभयो ।
नयाँअनलाइनसँग एप्समा पनि जोडिनुसक्नुहुनेछ । एन्ड्रइडको लागि यहाँ क्लिक गर्नुहोस् । त्यसैगरी हामीलाई फेसबुक, ट्वीटर र युट्युवमा पनि पच्छ्याउन सक्नुहुनेछ ।
