इटहरी, फागुन ३ ।

संघीय समाजवादी फोरम नेपालका अध्यक्ष उपेन्द्र यादवले संसद्मा दर्ता भएको संविधान संशोधन प्रस्ताव पास नभएसम्म संविधान कार्यान्वयनको सम्भावना नरहेको बताउनुभएको छ ।
संविधानको विभिन्न एक सय ८० ओटा धाराहरु संशोधन गर्न आवश्यक रहेको भन्दै अध्यक्ष यादवले संशोधनका माध्यमबाट मात्रै संविधान कार्यान्वयन सम्भव हुने बताउनुभएको हो ।
संघीय प्रेस फोरम नेपालले सोमबार सुनसरीको इटहरीमा गरेको ‘संयुक्त प्रदेश स्तरीय भेला तथा प्रशिक्षण कार्यक्रम’मा बोल्दै उहाँले आदिवासी जनजाति, मधेसी, मुस्लिम, थारुलगायत उत्पीडित समुदायका माग सम्बोधनको विकल्प नरहेको जिकिर गर्नुभयो ।
यादवले मुलुकमा भ्रष्टाचार र माफियातन्त्रका नाइकेहरुले कब्जा जमाइरहेको आरोप लगाउँदै तिनलाई परास्त गर्न उत्पीडित समुदायको अधिकार र न्यायको पक्षमा मिसन पत्रकारिता गर्न आग्रहसकेत गर्नुभयो ।
कार्यक्रममा बोल्दै ससफो सचिव परशुराम बस्नेतले विगतमा राज्यले आदिवासी जनजाति, मधेसी, खसलगायत समुदायसँग गरेको सम्झौता र सहमतिहरु कार्यान्वयन नगरेकाले नै उत्पीडित समुदायले आन्दोलन गरेको स्पष्ट पार्नुभयो ।
ससफोका अर्का सचिव अजम्बर राई काङमाङले उत्पीडितहरुको एकताबाट मात्रै मुक्ति सम्भव हुने दावी गर्नुभयो । मधेसी जनताको राष्ट्रियतामाथि अनर्गल प्रचार गर्नेका विरुद्ध संघीय प्रेस फोरमका पत्रकारहरुले कलमी संघर्ष थाल्नुपर्ने राईको भनाइ थियो ।
पार्टीका केन्द्रीय सदस्य तथा संघीय प्रेस फोरमका इन्चार्ज ध्यानबहादुर राईले पहिचान, परिवर्तन र उत्पीडित समुदायको अधिकारविरुद्ध प्रायोजित रुपमा भ्रम पैmलाइएको जिकिर गर्नुभयो ।
संघीय प्रेस फोरमका अध्यक्ष गोविन्द छन्त्यालले नेपाल पत्रकार महासंघको निर्वाचनका लागि रणनीति र कार्ययोजना बनाएर अघि बढ्नका लागि प्रदेश स्तरीय भेला आयोजना गरिएको जानकारी दिनुभयो ।
इटहरी–१ स्थित हिरा होटलमा आयोजित भेलामा लिम्बुवान, किरात र मधेस प्रदेशका विभिन्न जिल्लाका प्रतिनिधिहरु सहभागी भएका थिए ।
भेलाले महासंघको निर्वाचनमा समन्वय गर्न केन्द्रका साथै तीनओटै प्रदेशमा प्रदेश स्तरीय समन्वय समिति समेत गठन गरेको छ ।