राजकुमार याक्खा
माघ २२, संखुवासभा ।
संघीय समाजवादी फोरम नेपालका सचिव अजम्बर राई काङ्माङले तत्कालै स्थानीय तहको निर्वाचन नहुने बताउनुभएको छ । 
ससफो नेपालको संखुवासभा जिल्लास्थित पाथीभरामा शनिबार सम्पन्न इलाका स्तरीय जनसभालाई प्रमुख वक्ताका हैसियतले सम्बोधन गर्दै सचिव काङमाङले यस्तो बताउनुभएको हो । उहाँले संविधान संशोधनमा आवश्यक सुधार गरेर प्रदेशलगायत समानुपातिक समावेशीताको सुनिश्चिततापछि संसदीय चुनाव हुने जिकिर गर्नुभयो ।
‘अहिलेकै स्थितिमा प्रदेशको विषय टुङ्गो नलागी स्थानीय तहको निर्वाचन सम्भव छैन । राजनीतिक सहमतिका आधारमा संविधान संशोधनपछि संसदीय निर्वाचन हुनसक्छ ।’
ससफो नेपालका राजनीति समिति सदस्य आङ्काजी शेर्पाले आदिवासी जनजाति, महिला, मधेसी, शिल्पी (दलित) र पीछडा वर्गका समुदायलाई ठूला दलका नेताहरुले हतियारको रूपमा मात्र प्रयोग गरिरहेको आरोप लगाउनुभयो । सभालाई सम्बोधन गर्दै शेर्पाले भन्नुभयो –‘बिगतका सबै खाले भ्रमहरुबाट मुक्त भएर हामी अब आफ्ना अधिकारका लागि आफै लड्छौं ।’ उहाँले संघीय समाजवादी फोरमले हिमालदेखि तराई मधेस र मेचीदेखि महाकालीसम्मका उत्पीडित जनसमुदायको भावना बोकेर राष्ट्रिय राजनीतिक नेतृत्व प्रदा गर्ने जिकिर गर्नुभयो ।
सभामा बोल्दै ससफोका केन्द्रीय सदस्य एवम् संखुवासभा जिल्ला इन्चार्ज दीपककुमार याक्खाले उत्पीडित जाति, वर्ग, समुदायले राजनीतिक र पहिचानको अधिकार नपाएसम्म मुलुकले विकास र समृद्धि प्राप्त गर्न नसक्ने जिकिर गर्नुभयो । संखुवासभा जिल्ला अध्यक्ष कवान सेन राईले संविधान संशोधन नभएसम्म स्थानीय चुनाव हुन नदिने दावी गर्नुभयो ।
सभामा विभिन्न दल त्यागेर ४० भन्दा बढी मानिसहरु संघीय समाजवादी फोरम, नेपालमा प्रवेश गरेका फोरम पाथीभरा अध्यक्ष डिल्लीकुमार राईले जानकारी दिनुभयो ।
नयाँअनलाइनसँग एप्समा पनि जोडिनुसक्नुहुनेछ । एन्ड्रइडको लागि यहाँ क्लिक गर्नुहोस् । त्यसैगरी हामीलाई फेसबुक, ट्वीटर र युट्युवमा पनि पच्छ्याउन सक्नुहुनेछ ।
