२१ पुस, काठमाडौं ।
सरकारले संसद्मा दर्ता गराएको संविधान संशोधन विधेयक आइतबार टेबल हुने भएको छ ।
बिहीबार प्रधानमन्त्री निवास बालुवाटारमा बसेको सत्तारुढ कांग्रेस–माओवादी र मधेसी मोर्चाको बैठकपछि संशोधन प्रस्ताव टेबल गर्ने सहमति भएको हो ।
सत्तारुढ दलहरुको बैठकमा सर्वाेच्च अदालतको पछिल्लो आदेशबारे छलफल गर्दै दलहरुबीच यस्तो निर्णय भएको हो । सर्वाेच्चको आदेश सकारात्मक भएको भन्दै बैठकले आइतबारको संसद् बैठकमा संंशोधन विधेयक टेबल गर्ने निर्णय गरेको समाचार स्रोतले जनाएको छ ।
बैठकपछि सञ्चारकर्मीहरुसँग कुराकानी गर्दै सदभावना पार्टीका अध्यक्ष राजेन्द्र महतोले आइतबार संसद्मा विधेयक टेबल हुने र मधेसी मोर्चाले माग गरेबमोजिम परिमार्जन गरेर पारित गरिने निर्णय भएको जानकारी दिनुभएको हो ।
बैठकमा राज्य पुनर्संरचना टुंग्याउन आयोग गठन गर्न मोर्चाका नेताले दवाब दिएका थिए । तर, कांग्रेस सभापति शेरबहादुर देउवा बैठकमा अनुपस्थित रहेकाले सो विषयमा थप छलफल हुन नसकेको मोर्चाका नेता केशव झाले जानकारी दिनुभयो ।
यसैबीच प्रमुख प्रतिपक्षी नेकपा एमालेले भने संविधान संशोधन प्रस्ताव टेबल भए प्रतिवाद गर्ने चेतावनी दिएको छ । बिहीबार राजधानीमा आयोजित एक कार्यक्रममा बोल्दै एमाले अध्यक्ष केपी शर्मा ओलीले सर्वोच्चको आदेशले संशोधन गर्न नपाइने भनी स्पष्ट भइसकेको भन्दै संशोधन अघि बढे प्रतिवाद गरिने बताउनुभएको हो ।
नयाँअनलाइनसँग एप्समा पनि जोडिनुसक्नुहुनेछ । एन्ड्रइडको लागि यहाँ क्लिक गर्नुहोस् । त्यसैगरी हामीलाई फेसबुक, ट्वीटर र युट्युवमा पनि पच्छ्याउन सक्नुहुनेछ ।
