१५ पुष, धरान ।
याक्खा संस्कृतिमा आधारित ओम्ला चलचित्रको प्रिमियर शो धरानमा हुनेभएको छ ।
याक्खा कलाकार संघ सुनसरीको व्यवस्थापनमा ओम्लाको प्रदर्शनी तयारी थालिएको निर्माता एवम् चलचित्रका नायक अजय जिमीले जानकारी दिनुभयो । पुष २५ गते प्रदर्शन हुने चलचित्रको प्रिमियर शोका लागि आवश्यक तयारी थालिएको हो । 
याक्खा संस्कृति र मझिया प्रथाका सकारात्मक पक्षहरुलाई चलचित्रमा समेटिएको जिमीको भनाइ छ । ओम्ला यसअघि नै चलचित्र विकास वोर्डअन्तर्गतको आदिवासी जनजाति चलचित्र प्रोहत्सान सम्मानबाट सम्मानित भइसकेको चलचित्र हो ।
चलचित्रमा याक्खा बाहुल्य परिवेश र याक्खा जातिको मौलिक पूजा युच्याङ, मौलिक नृत्य डोकेनी, याक्खा जातिको मृत्यु संस्कार, चोरी बिवाह आदि साँस्कृतिक दृश्यहरुलाई देखाइएको निर्माण नियन्त्रक राजकुमार याक्खाले जानकारी दिनुभयो ।
अरुणकुमार प्रधानको निर्देशन रहेको चलचित्रमा अजय जिमी, सिर्जना निङ्लेकु, सागर सिंगक, मागमान जिमीलगायतको मुख्य भूमिका रहेको छ ।
३५ लाख बढी लागतमा निर्मित चलचित्र ओम्लालाई विभिन्न फिल्म फेस्टिबलमा समेत लैजाने तयारी भइरहेको निर्माता जिमीले बताउनुभयो । धरानमा गर्न लागिएको प्रिमियर शोका लागि टिकट बिक्री कार्य चलिरहेको छ । 
धरानमा ओम्ला चलचित्र प्रदर्शनीका लागि विशेषतः याक्खा समुदायसँग सहयोग लिने काम जारी रहेको याक्खा कलाकार संघ सुनसरीका अध्यक्ष जीवन देवानले जानकारी दिनुभयो । मौलिक याक्खा संस्कृति समेटिएको हुनाले प्रदर्शनको तयारी सकारात्मक रहेको र सबैले सहयोग गरिरहेको देवानको भनाइ छ ।
चलचित्र राजधानीलगायत याक्खा बाहुल्य जिल्लाहरु र भारतको दार्जिलिङ, सिक्किममा पनि प्रदर्शनका लागि छलफल भइरहेको निर्माण पक्षको भनाइ छ ।
नयाँअनलाइनसँग एप्समा पनि जोडिनुसक्नुहुनेछ । एन्ड्रइडको लागि यहाँ क्लिक गर्नुहोस् । त्यसैगरी हामीलाई फेसबुक, ट्वीटर र युट्युवमा पनि पच्छ्याउन सक्नुहुनेछ ।
