सन्देश सुब्बा
पाँचथर/ जीतेन राईको परिकल्पना, कथा र संगीतमा बनेको किराती मिथकमा आधारित नेपाली चलचित्र ‘बिनायो’ को शनिबार फिदिममा विशेष प्रदर्शन भएको छ ।
यसअघि देश–विदेशका विभिन्न स्थानहरुमा प्रदर्शन भइसकेको तथा नेफ्टा अवार्ड प्राप्त ‘बिनायो’ हेर्न फिदिम स्थित जिविसको सभाहलमा दर्शकको घुइचो लागेको थियो । चलचित्रमा आदिम किराती पूर्खा तायामा, खियामा र हेत्छाकुप्पाको मिथकलाई उतारिएको छ । मिथकमा वर्णन गरिए अनुसार अभिभावकबिहीन दिदीबहीनि तयामा र खियामा अनि भाई हेत्छाकुप्पाको जीवन भोगाईका दुःख र दर्द वरिपरि चलचित्रको कथा घुमेको छ ।

किरात राईहरुको ऐतिहासिक थलो खोटाङको खार्मी, रुपाकोट, रावाखोला, तावाचुङ लगायतका विभिन्न ऐतिहासिक स्थानहरुमा छायाङ्कन गरिएको ‘बिनायो’ ले पूर्खाहरुले बाँचेको जीवन, गरेको संघर्ष र धानिल्याएको संस्कार–संस्कृति प्रति युवा पुस्तामा प्रेम जागृत गराउँछ । किराती कला र संस्कृतिको संरक्षणार्थ निर्माण गरिएको चलचित्रमा देखाइएको पारिवारिक प्रेमको मर्म र महत्वले दर्शकलाई भावुक बनाउँछ ।
नाइमा फिल्मस् प्रोडक्सनको ब्यानरमा जीतेन आफैंले निर्माण गरेको ‘बनायो’ लाई रोशन राईले निर्देशन गरेका छन् । युवराज खत्रीको छायाङ्कन तथा सम्पादन रहेको ‘बनायो’ मा सान्ध्या साम्पाङ, एलिशा राई र कपिल वान्तावा लगायतका कलाकारहरुले भनियन गरेका छन् ।

जीतेनको एकल प्रस्तुती समेत सम्पन्न

किरात राई यायोक्खा जिल्ला कार्य समिति पाँचथरले संयोजन गरेको ‘बिनायो’ विशेष प्रदर्शनीकै अवशरमा वरिष्ठ गायक तथा संगीतकारको रुपमा परिचित जीतेन राईले एक प्रस्तुती समेत दिएका छन् ।
दक्षिणी पाँचथरको दुर्गम गाविस फलैंचामा जन्मे–हुर्केर झापा हुँदै हाल राजधानी बस्दै आएका जीतेनले ‘मलाई जन्म दिने पाँचथर जिल्लाबासीको मायामा …’ भन्दै आधा दर्जन बढी आफ्ना चर्चित गीत पस्केका थिए । झण्डै दुई घन्टा सम्म एकल प्रस्तुती दिएका जीतेनले ‘मट्टीको कसम …’, ‘पारुहाङ्की सन्तान तिमी …’, ‘उराठै लाग्छ नि …’, ‘मालिङ्गो काटि नि लै–लै …’ लगायतका लोकप्रिय गीत गाएका थिए ।
पूर्वेली लोक–आधुनिक गीत–संगीतमा बेग्लै ख्याती कमाएका जीतेनलाई उपस्थित दर्शक–स्रोताले नाँचेर साथ दिएका थिए । चलचित्र हेर्न आएका दर्शकलाई जीतेका गीत–संगीतको पनि रस्वस्वादन गराउँने उदेस्यले एकल प्रस्तुतीको समेत कार्यक्रम राखिएको किराया पाँचथरका सल्लाहकार सगुन सुसाराले बताए ।