सन्देश सुब्बा
पाँचथर/ जिल्लाको भारपा–८, का कृष्ण बहादुर विश्वकर्माले दुबै मृगौलामा खराबी देखिएर जीवन र मृत्यु सँग संघर्ष गरिरहेकी आफ्नी श्रीमतिको उपचारका लागि सहयोगको याचना गरेका छन् ।
बिहीबार फिदिममा पत्रकारहरु सँग कुराकानी गर्दै कृष्णले उपचार गर्ने पैशा नहुँदा अहिले आफ्नी जीवनसंगीनि ३९ वर्षिया विष्णु शंकर घरैमा छट्पटाइरहेकी बताए । अस्वभाविक रुपमा ब्लिलिङ् हुने समयस्या देखिएपछि कृष्णले विष्णुलाई मंसीर २० गते पाँचथर अस्पतालमा जचाउँन ल्याएका थिए ।
डाक्टरले उच्च रक्तचापका कारण विष्णुको मृगौलामा असर परेको भन्दै तत्काल ठूलो अस्पतालमा लान सुझाब दिएपछि उनलाई झापाको बिर्तामोड स्थित मनमोहन मेमोरियल अस्पताल पु¥याइयो थियो । त्यहाँ जचाउँदा विष्णुको दुबै मृगौलामा खराबी देखिएको र तुरुन्त विशेषज्ञ डाक्टरकहाँ लान भनेको श्रीमान कृष्णले बताए ।

उनले पत्रकारहरु सँग आँशु खसाउँदै भने– ‘भएको पैशा सबै सकियो त्यसैले श्रीमतिलाई विवश भएर घर फर्काएँ, अहिले उनको उपचारको लागि सहयोगीहरुको खोजिमा छु ।’ कृष्णका अनुसार विष्णुको दुबै मृगौलाको ५० प्रतिशत भाग ड्यामिज भएको हुनसक्ने डाक्टरले बताएका छन् । यसको यकिन भने विशेषज्ञ डाक्टरलाई देखाएपछि मात्र हुनेछ ।
गत वर्षको वैशाख १२ गते आएको महाभूकम्पमा क्षति भएको घर समेत पुनःनिर्माण गर्न नसकिरहेको बेला कृष्णलाई अर्को समस्या आइलागेको हो । दुई छोरा र दुई छोरी रहेको कृष्णको केही वर्ष अघि जेठा छोरा सुनिलमा अपाङ्गताको र जेठी छोरी एलिशा र कान्छी एलिजामा समेत आफैं बेहोस भएर ढल्ने समस्या देखिएको थियो ।
विभिन्न संघ–संस्थाहरुको सहयोगमा उपचार पछि हाल १८ वर्ष पुगेका सुनिल र १६ वर्षकी एलिशामा त्यो समस्या हटेको छ तर कान्छी १४ वर्षिया एलिजालाई भने पूर्ण रुपले बिरामले छोडेको छैन । मस्तिष्क र नशाको समस्या झेलिरहेकी एलिजाले अहिले पनि औषधी सेवन गरिरहेको कृष्णले बताए ।
एकपछि अर्को समस्याले च्यापिरहेको बेला फेरि श्रीमतिको दुबै मृगौलामा खराबी देखिएपछि कृष्ण झन समस्यामा परेका छन् । कमजोर आर्थिक अवस्था भएका उनले आफ्नी श्रीमतिलाई बचाउँन सबै सँग आर्थिक सहयोगको याचना गरेका छन् ।