दमक, २५ कार्तिक ।
शन्ति, प्रगति र समृद्धि भन्ने मूल नाराका साथ अमेरिकाको टेक्सास राज्यस्थित इर्विङमा हुन लागेको बृहत् अन्तर्राष्ट्रिय सिर्जनात्मक अनुष्ठान तेश्रो संस्करण बारे बिहीबार झापाको दमकमा पत्रकार सम्मेलन सम्पन्न गरिएको छ । 
विश्व भुटानी साहित्यिक संगठन (जिबिएलओ) को मुख्य आयोजनामा नोभेम्बर २५ र २६ तारिकमा हुन लागेको सिर्जनात्मक अनुष्ठानको प्रचारका लागि दमकमा पत्रकार सम्मेलन गरिएको हो । अनुष्ठानका लागि नेपालस्थित प्रचार संयोजक कमन देवानले पत्रकार सम्मेलनमा जिबिएलओबाट जारी प्रेस विज्ञप्ति वाचन गरेर स्थानीय पत्रकारहरूलाई जानकारी गराउनुभएको थियो ।
पत्रकार सम्मेलनमा बोल्दै देवानले अनुष्ठानमा अमेरिकाका विभिन्न २२ राज्यका प्रतिनिधि हुने तय भएको बताउनुभयो । त्यस्तै भारत, हङकङ, अष्ट्रेलिया, क्यानडा, न्युजील्याण्डलगायत मुलुकबाट पनि प्रतिनिधिहरू सहभागी गराउने तयारी भईरहेको उहाँले स्पष्ट पार्नुभयो ।
अनुष्ठानको मुख्य लक्ष्य नयाँ पिढीलाई नेपाली संस्कृति, कला, साहित्य र संगीतको क्षेत्रमा आकर्षित गर्नु रहेको पत्रकार सम्मेलनमा जारी प्रेस विज्ञप्तिमा उल्लेख छ । विज्ञप्तिमा राजनीति, भूगोल, धर्म आदि कारणले अलग भए पनि भाषा, साहित्य र कलाका माध्यमबाट संसारभरका नेपाली एक हुन सक्ने उल्लेख छ ।
संसारभर रहेका भुटानी प्रतिभाहरूलाई साझा मञ्च प्रदान गर्ने उद्देश्यसहित जिबिएलओको गठन गरिएकाले लक्ष्यअनुसार नै विभिन्न कार्यक्रम गर्दै अघि बढेको आयोजक संस्थाका अध्यक्ष एवम् कार्यत्रलमका संयोजक डेन्जोम साम्पाङले अमेरिकाबाट जानकारी दिनुभएको छ । अनुसार अनुष्ठानमा साहित्य, कला र संगीत बारे विमर्श गर्ने, प्रवासमा रहेका नेपालीहरूले कसरी नेपाली संस्कृतिलाई जगेर्ना गर्ने ? साहित्य, कला र संस्कृतिको संरक्षणका लागि विभिन्न सेसनमा बृहत् छलफल गरी निष्कर्ष निकाल्ने साम्पाङले बताउनुभयो ।
सिर्जनात्मक अनुष्ठान सम्पन्न गर्ने अर्गनाइजेशन अफ भुटनिज सोसाइटी र भुटनिज लिगेसी क्लबले सह–आयोजकको भूमिका निर्वाह गर्ने र सहयोगी संस्थाहरूमा स्रष्टा मञ्च डल्लास, भुटनिज कम्युनिटी इन अबिलेन, भुटनिज अमेरिकन एसोसिएसन अफ होस्टोन, इश्टर्न क्रिएसन, स्टार इन्टरटेन्मेन्ट र भुटनिज अमेरिकन स्पोर्टस काउन्सिल रहने जिबिएलओका प्रवक्ता कर्ण गुरुङले अमेरिकाबाट जानकारी दिनुभएको छ । कार्यक्रमको तयारी अन्तिम चरणमा पुगेको गुरुङले नयाँ अनलाइनलाई बताउनुभयो ।
कार्यक्रममा नेपाली साहित्यमा फरक सिद्धान्त (भयवाद)का प्रवर्तक साहित्यकार देश सुब्बा (हङकङ), भारतको दार्जिलिङबाट विद्या सुब्बा, सिक्किमबाट डाक्टर कविता लामा, क्यानाडाबाट डाक्टर माइकल फिसर सहभागी हुने पक्का भएको जिबिएलओले जनाएको छ ।
नयाँअनलाइनसँग एप्समा पनि जोडिनुसक्नुहुनेछ । एन्ड्रइडको लागि यहाँ क्लिक गर्नुहोस् । त्यसैगरी हामीलाई फेसबुक, ट्वीटर र युट्युवमा पनि पच्छ्याउन सक्नुहुनेछ ।
