कमन देवान
काठमाडौं, २१ कार्तिक ।
शन्ति, प्रगति र समृद्धि भन्ने मूल नाराका साथ तेस्रो मुलुक पुनर्वास भएका भुटानी स्रष्टाहरूले अमेरिकाको टेक्सास राज्यस्थित फोर्ट वर्थमा बृहत् अन्तर्राष्ट्रिय सिर्जनात्मक अनुष्ठान ३ (२०१६) को आयोजनाका लागि तयारी थालेका छन् । 
विश्व भुटानी साहित्यिक संगठन (जिबिएलओ) को मुख्य आयोजनामा नोभेम्बर २५ र २६ तारिकमा हुन लागेको सिर्जनात्मक अनुष्ठानका लागि आवश्यक तयारी सुरु भएको जिबिएलओ अध्यक्ष डेन्जम साम्पाङ राईले जानकारी दिनुभएको हो । अध्यक्ष राईले भन्नुभयो –‘अमेरिकाका विभिन्न २२ राज्यका प्रतिनिधि अनुष्ठानमा सहभागी हुनेछन् । त्यस्तै अष्ट्रेलिया, क्यानडा, न्युजील्याण्डलगायत मुलुकबाट पनि प्रतिनिधिहरू सहभागी गराउने तयारीमा जुटेका छौं ।’
अनुष्ठानको मुख्य लक्ष्य नयाँ पिढीलाई कला, साहित्य, संगीत र विज्ञानका क्षेत्रमा आकर्षित गर्नु रहेको राईको भनाइ छ । संसारभर रहेका भुटानी प्रतिभाहरूलाई साझा मञ्च प्रदान गर्ने उद्देश्यसहित जिबिएलओको गठन गरिएकाले लक्ष्यअनुसार नै विभिन्न कार्यक्रम गर्दै अघि बढेको आयोजकले जनाएको छ । 
सिर्जनात्मक अनुष्ठान सम्पन्न गर्ने अर्गनाइजेशन अफ भुटनिज सोसाइटी र भुटनिज लिगेसी क्लबले सह–आयोजकको भूमिका निर्वाह गर्ने र सहयोगी संस्थाहरूमा स्रष्टा मञ्च डल्लास, भुटनिज कम्युनिटी इन अबिलेन, भुटनिज अमेरिकन एसोसिएसन अफ होस्टोन, इश्टर्न क्रिएसन, स्टार इन्टरटेन्मेन्ट र भुटनिज अमेरिकन स्पोर्टस काउन्सिल रहने जिबिएलओका प्रवक्ता कर्ण गुरुङले जानकारी दिनुभयो ।
कार्यक्रममा नेपाली साहित्यमा फरक सिद्धान्त (भयवाद)का प्रवर्तक साहित्यकार देश सुब्बा (हङकङ), भारतको दार्जिलिङबाट विद्या सुब्बा, सिक्किमबाट डा. कविता लामा, क्यानाडाबाट डा. माइकल फिसर सहभागी हुने पक्का भएको जिबिएलओले जनाएको छ । साहित्य, संगीत र कलाको त्रीवेणी संगम हुने कार्यक्रममा गायक खर्क गजमेरको गीति एल्बम ‘काली’को विमोचन हुने छ । दुई दिने कार्यक्रममा विभिन्न साहित्यिक, साँस्कृतिक प्रस्तुतिहरू हुने प्रवक्ता गुरुङले बताउनुभयो । 
जिबिएसओ सन् २००९ मा नेपालको झापास्थित भुटानी शरणार्थी शिविरमा गैर नाफामूलक साहित्यिक संस्थाका रूपमा स्थापना गरिएको हो । यसले अनुष्ठानको पहिलो संस्करण झापाको खुदुनाबारीमा २०६८ सालमा आयोजना भएको थियो भने दोस्रो संस्करण अमेरिकाको नेब्रास्कामा २०१४ मा सम्पन्न भएको हो । आगामी नोभेम्बर महिनाको २५ र २६ तारिख अमेरिकाकै टेक्सास राज्यको अर्बिङमा आयोजना हुने अनुष्ठान तेस्रो संस्करण हो ।
नयाँअनलाइनसँग एप्समा पनि जोडिनुसक्नुहुनेछ । एन्ड्रइडको लागि यहाँ क्लिक गर्नुहोस् । त्यसैगरी हामीलाई फेसबुक, ट्वीटर र युट्युवमा पनि पच्छ्याउन सक्नुहुनेछ ।
