दमक, १७ कार्तिक ।
संघीय समाजवादी फोरम नेपालका अध्यक्ष उपेन्द्र यादवले संविधान संशोधन कार्य तत्काल अघि नबढे मुलुकमा नयाँ शिराबाट आन्दोलन थालिने बताउनुभएको छ । 
बुधबार पार्टीका केन्द्रीय सदस्य दिवंगत दुर्गाप्रसाद राजवंशीको १२औं दिनको पुन्य तिथिमा सहभागी हुन झापाको कोहबरा पुग्नुभएका अध्यक्ष यादवले सञ्चारकर्मीहरूसँग कुराकानी गर्दै तीन दलका शीर्ष नेताले संविधान संशोधनलाई आलटाल गरेर द्वन्द्व निम्त्याउन खोजेको आरोप लगाउनुभएको हो । सरकार गठनको समयमा गरिएको सहमति कार्यान्वयन नभए संघीय गठबन्धनले नयाँ शिराबाट आन्दोलन थाल्ने उहाँको भनाइ थियो । यादवले भन्नुभयो –‘हामी आन्दोलन रोकेर संविधान संशोधनका लागि उचित वातावरण बनाइरहेका छौं । तर, प्रमुख दलहरू त्यसलाई वास्ता गरिरहेका छैनन् । यो दुर्भाग्यपूर्ण छ ।’
स्वर्गीय राजवंशीले आफ्नो राजनीतिक जीवनमा उत्पीडित मधेसी, आदिवासी जनजातिलगायत शोषित वर्गका पक्षमा निरन्तर लडेको यादवले स्मरण गर्नुभयो । राजवंशीको योगदानलाई पार्टीले स्मरण गरिरहने उहाँले बताउनुभयो ।
कार्यक्रममा पार्टीका राजनीतिक समिति सदस्य एवम् लिम्बुवान प्रदेश समितिका अध्यक्ष आरसी तुम्बा, केन्द्रीय सदस्य एवम् झापा जिल्ला इन्चार्ज धनप्रसाद गुरुङ, केन्द्रीय सदस्य एवम् पूर्व सभासद् जयराम यादवलगायत प्रदेश, जिल्ला, क्षेत्र र नगर समितिका पदाधिकारीहरू सहभागी थिए ।
‘ताजपुरिया परिवारलाई समवेदना’
त्यस्तै, बुधबार नै अध्यक्ष यादवले मतृशोकमा रहनुभएका पार्टीका केन्द्रीय सदस्य नित्यानन्द ताजपुरिया र उहाँको परिवारजनलाई भेट गरी समवेदना प्रकट गर्नुभएको छ । अध्यक्ष यादवसहित पार्टीका विभिन्न तहका नेता कार्यकर्ता लखनपुर २ स्थित ताजपुरिया निवास पुग्नुभएको थियो ।
ताजपुरियाकी आमा दुनोसरी ताजपुरियाको सोमबार साँझ ७२ वर्षको उमेरमा बिराटनगरस्थित नोबेल अस्पतालमा उपचारका क्रममा निधन भएको थियो । उहाँका तीन छोराहरू नित्यानन्द, धर्मनारायण र सत्यनारायण हुनुहुन्छ भने एक छोरी मिराकुमारी ताजपुरिया हुनुहुन्छ ।
नयाँअनलाइनसँग एप्समा पनि जोडिनुसक्नुहुनेछ । एन्ड्रइडको लागि यहाँ क्लिक गर्नुहोस् । त्यसैगरी हामीलाई फेसबुक, ट्वीटर र युट्युवमा पनि पच्छ्याउन सक्नुहुनेछ ।
