जनकपुर, ८ कार्तिक ।
संघीय समाजवादी फोरम नेपालका अध्यक्ष उपेन्द्र यादवले राज्यले तयार पारेको स्थानीय तहको पुनर्संरचना आफूहरुलाई कु्नै पनि हालतमा मान्य नहुने बताउनु भएको छ ।
सोमबार जनकपुरमा ससफो नेपाल तराई मधेश प्रदेश कार्यालयको उद्घाटन गर्दे अध्यक्ष यादवले मधेस र मधेसीमाथि षड्यन्त्र गरेर निर्माण गर्नलागिएको स्थानीय तह अस्वीकार्य रहेको जिकिर गर्नुभएको हो । उहाँले भन्नुभयो –‘राज्यले बहुसंख्यक मधेसीलाई पाखा लगाएर स्थानीय तह पुनर्संरचनाका नाउँमा मधेस विरोधी षड्यन्त्र गरिरहेको छ । त्यसैले हामी चुप लागेर बस्दैनौं ।’  प्रमुख तीन दलले आफ्नो प्रभुत्व जमाउने उद्देश्यले स्थानीय तह पुनर्संरचना गर्न आयोग गठन गरेको उहाँको भनाइ थियो । मधेसमाथि उपनिवेशको शासन लाद्ने सपना नदेख्न चेतावनी दिँदै यादवले पहिले संघीय प्रदेशको संख्या र सीमाना टुङ्ग्याउनुपर्ने बताउनुभयो ।
अधिकारविहीन पारिएका मधेसी, आदिवासी जनजाति, म्ुस्लिम, थारु, महिला र दलित लगायत पिछडिएको सबै वर्गले अब नयाँ जनक्रान्तिका लागि एकगठ्ठा हुनुपर्ने यादवको भनाइ थियो ।
सो कार्यक्रममा बोल्दै ससफो नेपालका वरिष्ठ नेता अशोक राईले मुलुकको पहिचानवादी आन्दोलनलाई मधेस आन्दोलनले सिंचित गरेको बताउनुभयो । राईले अब आन्दोलन गर्नु परे हिमाल, पहाड र मधेशमा एक साथ आन्दोलन हुने दावी गर्नुभयो ।