इलाम, ५ कार्तिक ।
किरात राई यायोक्खाको भातृ संस्था किरात राई विद्यार्थी संघले इलाममा तय गरेको आठौं राष्ट्रिय सम्मेलनको तयारीलाई तीव्रता दिएको छ ।
राई विद्यार्थीहरूको साझा विद्यार्थी संगठन किराविले सम्मेलनको आवश्यक तयारी सुरु गरिएको जानकारी दिनुभयो । अध्यक्ष राईले भन्नुभयो –‘बुधबार सम्मेलनस्थल इलामबाट पत्रकार सम्मेलनको आयोजना गरी तयारी सुरु गरिएको छ ।’ किराविले मंसिर २६, २७ र २८ गते इलाममा हुने गरी सम्मेलनको तयारी अघि बढाएको हो । 
‘पूर्ण संघीयता र वैज्ञानिक शिक्षाका लागि विद्यार्थी आन्दोलन, किरात स्वायत्त राज्य निर्माण गर्न गाउँ जागरण अभियान’ मूल नारा दिएर सम्मेलनको तयारी थालिएको किरावि केन्द्रीय उपाध्यक्ष उत्तम राईले जानकारी दिनुभयो । सम्मेलन सम्पन्न गर्न अध्यक्ष जम्नेली राईको संयोजकत्वमा ५३ सदस्यीय आयोजक समिति र प्रतिवेदन लेखन, विधान संशोधन, आर्थिक, अतिथि सत्कार लगायतको विभिन्न १३ वटा उपसमिति गठन भएको केन्द्रीय सदस्य सुसन राईले बताउनुभयो ।
आसन्न सम्मेलनमा काठमाडौं उपत्यकासहित पूर्वका विभिन्न १८ वटा जिल्ला समितिका छ सय बढी प्रतिनिधि पर्यवेक्षकले सहभागिता जनाउने बताइएको छ । सम्मेलनको उद्घाटन सत्रमा गायक कुवेर राई, पार्वती राईलगायत कलाकारहरूले सांस्कृतिक कार्यक्रम प्रस्तुत गर्ने छन् । साकेला, च्याब्रुङ लगायतक मौलिक झाँकीहरुसमेत प्रस्तुत हुने आयोजकले जनाएको छ ।
सम्मेलनले किरात स्वायत्त राज्य किन आएन ? भन्ने विषयमा गम्भीर समीक्षा गर्ने छ । पहिचान सहितको संघीय राज्य स्थापनार्थ किरावि संघर्षरत रहेको र धर्मनिरपेक्षता, समानुपातिक, समावेशी राज्य कायम नभएसम्म आन्दोलन नरोक्किने बुधबार जारी विज्ञप्तिमा उल्लेख छ । संविधान संशोधन वा पुनरलेखन गरी किरात स्वायत्त राज्य प्राप्त नभए सशक्त आन्दोलन थालिने किराविले चेतावनी दिएको छ । 
इलामबाट सम्मेलनको तयारी सुरु गर्न आयोजित पत्रकार सम्मेलनमा किराविका सल्लाहाकार दिपेन बाला राई, यायोक्खा इलाम उपाध्यक्ष राम चाम्लिङ्ग राई, पूर्व केन्द्रीय उपमहासचिव प्रबिण चाम्लिङ्ग राई, जेबी राई, किरावि संघ इलामका अध्यक्ष ओपेन्द्र राई लगायत सहभागी थिए ।
नयाँअनलाइनसँग एप्समा पनि जोडिनुसक्नुहुनेछ । एन्ड्रइडको लागि यहाँ क्लिक गर्नुहोस् । त्यसैगरी हामीलाई फेसबुक, ट्वीटर र युट्युवमा पनि पच्छ्याउन सक्नुहुनेछ ।
