दमक, ५ कार्तिक ।
मण्डला थिएटर अनामनगरको घुम्ती नाट्य टोली यतिबेला पूर्वाञ्चलका विभिन्न सहरहरूमा नाटक प्रदर्शन गरिरहेको छ । 
पूर्वाञ्चल नाट्य यात्रामा रहेको मण्डलाको टोलीले यसअघि कार्तिक ३ गते धरानमा र ४ गते इटहरी र विराटनगरमा ‘मन चिन्ते फिरन्ते’ घुम्ती नाटक मञ्चन गरिसकेको छ । त्यस्तै शुक्रबार कार्तिक ५ गते मण्डलाले मोरङको लेटाङ बुधबारे र बेलाबारीमा नाटक प्रदर्शन गरेको हो । नाट्य टोलीले भोलि शनिबार साँझ ६ बजे दमकको गोरखा डिपार्टमेन्ट अगाडि प्रदर्शन गर्दैछ । उक्त नाटक नाटककार एवम् निर्देशक राजन खतिवडाले निर्देशन गर्नुभएको हो ।
त्यस्तै मण्डलाको टोलीले कार्तिक ९ गते दिउँसो १ बजे र ४ बजे नेपाली रङ्गमञ्च र रजतपटका स्टार दयाहाङ राईको निर्देशन रहेको अर्को नाटक ‘डिग्री माईला’ दमकस्थित रेडक्रस हलमा प्रदर्शन गर्दैछ । दमकमा हुने टिकट शो नाटकका लागि स्थानीय आयोजक युथ फर ब्लड झापा रहने जनाइएको छ । युथ फर ब्लडका झापा संयोजक विकास सापकोटाले नाटकका लागि टिकट बिक्रीको काम भइरहेको जानकारी दिनुभयो । 
सो नाटक १० गते बेलबारीको साँस्कृतिक भवनमा, ११ गते इटहरीको तायारिम्बी हल, १२ गते बिराटनगरको गुरुकुल र १३ गते धरानको सभागृहमा सोही समयमा प्रदर्शन हुने नाट्य यात्रामा सहभागी मण्डलाका कलाकार सिजन दाहालले जानकारी दिनुभयो ।
नाटकमा दयाहाङ राई, राजन खतिवडा, सिर्जना सुब्बा, बुद्धि तामाङ, नाजिर हुसेन, प्रदीप कुमार चौधरीलगायत कलाकारहरूको अभिनय रहेको छ । मण्डलाले आयोजक लेट्स ईन्टरटेनमेन्ट प्रा लिसँगको सहकार्यमा पूर्वाञ्चलभरि घुम्ती नाटक प्रदर्शनमा ल्याएको हो ।
नयाँअनलाइनसँग एप्समा पनि जोडिनुसक्नुहुनेछ । एन्ड्रइडको लागि यहाँ क्लिक गर्नुहोस् । त्यसैगरी हामीलाई फेसबुक, ट्वीटर र युट्युवमा पनि पच्छ्याउन सक्नुहुनेछ ।
