दमक, ४ कार्तिक ।
झापाको दमकमा दशैंयता डेंगु रोगको संक्रमण बढेको छ । १५ दिन यता दमकमा १९ जनालाई डेंगु संक्रमण देखिएको हो ।
डेंगु संक्रमित बिरामीहरूको दमकस्थित विभिन्न अस्पतालहरूमा उपचार भइरहेको छ । अस्पतालहरूमा दैनिक चार जना भन्दा बढी डेंगु संक्रमित बिरामी उपचारका लागि आउने गरेको बताइएको छ । 
कार्तिक महिना सुरुभएसँगै चार दिनमा मात्रै दमकस्थित एड्भान्स हेल्थ केयर सेन्टरमा उपचाररत १२ जना बिरामीलाई डेंगुको संक्रमण भएको प्रमाणित भएको अस्पतालका मेडिकल डाईरेक्टर डा. सन्तोष सुवेदीले जानकारी दिनुभयो ।
संक्रमित मध्ये १० जना पुरुष र दुई जना महिला रहेका छन् । यस्तै लाईफलाईन अस्पातलमा पाँच जना डेंगु संक्रमित बिरामी फेला परेका हुन् । यस अघि धरानमा उपचाररत दमकका एक जनामा डेंगुको संक्रमण फेला परेको थियो । डेंगुका बिरामी दमक र नजिकका गाउँहरूबाट उपचार गर्न आएका लाईफलाईन अस्पतालका अध्यक्ष बालचन्द्र सुब्बाले जानकारी दिनुभयो । डेंगुका विरामी बढेसँगै जनस्वास्थ्य कार्यालयसँग सहकार्य गरेर निःशुल्क उपचारको ब्यवस्था मिलाइएको अध्यक्ष सुब्बाले बताउनुभयो । 
दमकको एकमात्र सरकारी अस्पताल दमक अस्पतालमा उपचाररत एक जना बिरामीमा पनि डेंगु रोगको संक्रमण देखिएको अस्पतालले जनाएको छ । नेपाल उद्योग वाणिज्य महासंघका केन्द्रीय सदस्य प्रकाश प्रसाई नर्भिक अस्पतालमा उपचाररत हुनुहन्छ ।
जिल्ला जनस्वास्थ्य कार्यालय झापाले प्रत्येक वर्ष जनचेतनामूलक कार्यक्रम गर्दै आएको भए त्यो औपचारिकतामा मात्र सीमित रहेको सरोकारवालाहरूले गुनासो गरेका छन् । चिकित्सकहरूका अनुसार मानिसमा एडिज एजिप्टी जातको पोथी लामखुटेले टोक्दा डेंगुको संक्रमण सर्दछ । डेंगु संक्रमित बिरामीलाई उच्च ज्वरो आउने, वान्ता हुने, जोर्नीका हाडहरु दुख्ने, शरीरमा प्लेटलेस कम भएपछि निलो, रातो डामहरू देखापर्ने हुन्छ ।
नयाँअनलाइनसँग एप्समा पनि जोडिनुसक्नुहुनेछ । एन्ड्रइडको लागि यहाँ क्लिक गर्नुहोस् । त्यसैगरी हामीलाई फेसबुक, ट्वीटर र युट्युवमा पनि पच्छ्याउन सक्नुहुनेछ ।
