काठमाडौं, ३० असोज ।
सात वर्षपछि पहिलोपटक अन्तर्राष्ट्रिय क्रिकेट प्रतियोगितामा जित हात पारेको नेपाली महिला टोलीले आगामी प्रतियोगितामा टेस्ट राष्ट्रहरूलाई हराउने लक्ष्य राखेको जनाएको छ ।
‘वीमेन्स एसिया कप’का लागि छनोट भएको नेपाली महिला क्रिकेट टोलीले अर्को महिना हुने सो प्रतियोगितामा टेस्ट राष्ट्रलाई हराउने लक्ष्य राखेको जनाएको हो । हङकङमा सञ्चालन भइरहेको विश्वकप क्रिकेटको एसियाली छनोटमा शनिबार चीनलाई हराएर दोस्रो स्थान हात पार्दै नेपाली महिला टोली एसिया कपमा छानिएको हो । 
एसिया कपमा नेपालले थाइल्याण्डसहित भारत, पाकिस्तान, श्रीलंका र बांग्लादेशसँग खेल्ने पक्का भएको हो ।
विश्वकप छनोट प्रतियोगिताको एसियाली छनोटमा उपविजेता भएर ‘वीमेन्स एसिया कप’मा छनोट भएको नेपाली महिला क्रिकेट टोलीले सो प्रतियोगितामा भारत र पाकिस्तान जस्ता टेस्ट राष्ट्रसँग पहिलो पटक खेल्न लागेको हो ।
हङकङमा विश्वकप छनोट खेल्न पुगेको नेपाली टोलीले सुरुमा कमजोर खेल प्रस्तुत गरे पनि प्रभावशाली अन्त्य गर्दै चार राष्ट्र सम्मिलित प्रतियोगितामा दोस्रो स्थान सुरक्षित गरेपछि एसिया कपका लागि छनोट भएको हो । नेपाली महिला टोलीले अन्तर्राष्ट्रिय उपाधि जितेको यो सात वर्ष पछि हो । महिला टोली सोमबार नेपाल फर्कंदैछ ।
नयाँअनलाइनसँग एप्समा पनि जोडिनुसक्नुहुनेछ । एन्ड्रइडको लागि यहाँ क्लिक गर्नुहोस् । त्यसैगरी हामीलाई फेसबुक, ट्वीटर र युट्युवमा पनि पच्छ्याउन सक्नुहुनेछ ।
