सन्देश सुब्बा/ असोज २१
पाँचथर/ जिल्लाको पर्यटन प्रबद्र्धनका लागि मेची–पहाडी पर्यटन प्रवद्र्धन विकास समितिले ४० लाख बजेट विनियोजन गरेको छ । गत आर्थिक वर्षमा ७० लाख रकम बिनियोजन गरेको समितिले यसपल्ट ४० लाख मात्र छुट्याएको हो ।
बिनियोजित रकमले जिल्लाको पौवाभन्ज्याङमा पर्यटन सूचना केन्द्र स्थापना गर्ने जसका लागि १० लाख रुपैंयाँ खर्च गर्ने जनाइएको छ । त्यस्तै लिम्बाको गोधुला–भोजुला पोखरीको पूर्वाधार विकासका लागि १० लाख, माङ्जाबुङको थेङ्ने चोक्मा ऐतिहासिक स्थल, यासोकको कुम्मायक–कुस्सायकका मन्दिर, एकतीनको आगेजुङ गुम्बा र जोरपोखरी मन्दिर संरक्षण र पूर्वाधार विकासका लागि ५–५ लाख रकम छुट्याइएको हो ।
यी योजना पर्यटन प्रबद्र्धनका लागि स्थानीयस्तरमा गठित संघ–संस्था र स्थानीय उपभोक्ता समूह मार्फत सम्पन्न गरिने समितिका कार्यकारी निर्देशक केशव धौरालीले बताए । जसका लागि प्रस्ताव आह्वान समेत गरिसकिएको धौरालीको भनाई छ ।
समितिले तिम्बुङ पोखरी, हिलिहाङ दरबार, सुम्हा?लुङ गढी, लब्रेकुटी–सिलौटी जस्ता ऐतिहासिक महत्व बोकेका पर्यटकीयस्थलका लागि भने रकम नछुट्याएको भन्दै जिल्लाका सरोकारवालाले आलोचना गरेका छन् ।
नयाँअनलाइनसँग एप्समा पनि जोडिनुसक्नुहुनेछ । एन्ड्रइडको लागि यहाँ क्लिक गर्नुहोस् । त्यसैगरी हामीलाई फेसबुक, ट्वीटर र युट्युवमा पनि पच्छ्याउन सक्नुहुनेछ ।
