सानै उमेरदेखि नुमा राई कलाकारितामा चासो राख्थिन् । तर सुगम जिल्लाको दुर्गम गाउँमा उनको जन्म भएकोले गर्दा आफ्ना रहरहरुलाई मनभित्रै खुम्च्याउनु पर्ने भयो । गाउँमा हुने सांस्कृतिक कार्यक्रममा भाग त लिने गरेकी नै हुन्, र क्लवमार्फत पनि आफ्ना कलालाई पस्काउने जमर्को गरेकी थिइन् । तर त्यसबेलाको कला गाउँमै मात्र सिमित भयो ।
उदयपुर जिल्लाको कटुन्जे ८ वाबुङमा जन्मिएकी हुन् नुमाले । माध्यमिक शिक्षा लिइञ्जेल गाउमै बस्नु पर्ने नेपालीहरुको नियती नै हो । माध्यमिक शिक्षा पुरा गरेर उच्च शिक्षाको लागि बाहिर जाँदा पनि आफ्नो रहरलाई बाहिर ल्याउन सकेकी थिइनन् । समयक्रमले उनलाई कुवेत पु¥यायो । कुवेत चाही उनको लागि सपना पुरा हुने देश बन्न पुग्यो । त्यहाँ पुगेपछि उनले आफ्ना कलाकारितालाई निखार्ने मौका पाइन् । अहिलेसम्म ५ वटा म्युजिक भिडियोमा काम गरिसकेकी छिन् ।
६ वर्ष अगाडि कुवेत पुगेकी हुन् नुमा । कुवेत पुगेपछि, आफ्नो भाषा लिपि संस्कृति जोगाउने अभियान बोकेको संस्था किरात राई यायोख्खासँग आवद्धता नै कलाकारितालाई अगाडि बढाउने माध्यम बन्यो उनको लागि । यायोक्खाले गर्ने कार्यक्रममा सक्रिय हुनाले धेरै नेपालीसँग चिनजान हुन पुग्यो । त्यो चिनजानमा आफ्ना सपना पनि बाड्न पुगिन् । त्यही चिनजानको माध्यमबाट सुरेश ग्यावाको ‘चरिकोटको बजार…’ बोलको गीतमा सर्वप्रथम अभिनय गर्न पुगेकी थिइन् । त्यसपछि सागर खड्काको ‘हेरे साराले…’ मिलन लामाको ‘घाम लागेको दिन…’, विकास मगरको ‘यो मनलाई तिमीसँग…’ र राजबाबु थुलुङको ‘आखिर स्वार्थपुर्तिमा…’ अभिनय गरेकी छिन् ।
कुबेतमा रहेर कलाकारिता गर्नु निकै जटिल नै रहेको उनी बताउँछिन् । “खुल्लारुपमा कला गला प्रस्तुत गर्न पाइने अवस्था छैन । कलाकरितामा प्रवेश गरेपछि मनमुटु दह्रो बनाउनु पर्ने अवस्था छ । यहाँको कानुन र समाजसँग जुध्दै नेपाली कला र सिर्जनालाई जोगाउनु पर्ने अवस्था छ ।” उनी थप्छिन् ।
प्रवासमा १२ घण्टा ड्युटी गर्दै, हप्तामा १ दिन बाँकी समयमा यहि कला कलाकारितालाई समय दिनुपर्ने हुन्छ । फेरि नेपालीहरुले वास्तविकता नबुझी खाडी मुलुकमा जाने युवतीहरुलाई गलत नजरले नै हेर्ने भएको त्यस चुनौतीलाई पार गर्नु एकातिर छँदैछ नै । तर आफ्ना काम र प्रयत्नले त्यस्ता चुनौतीलाई सजिलैसँग पार गर्न सक्ने उनमा हिम्मत भने छ ।
पछिल्लो समयमा सामाजिक सञ्जालको माध्यमबाट विभिन्न देशमा रहेका नेपालीहरुले एउटा सिर्जनात्मक समूह बनाएका छन् । उक्त समूहको नाम प्रतिभा परिवार रहेको छ । यस समूहले ‘प्रतिभा’ एल्बम (भाग १) ल्याउन लागेको छ । उक्त एल्बममार्फत उनी आफ्ना आवाजलाई पनि सबै सामू ल्याउने प्रयत्नमा छिन् । उक्त समूहमा सञ्जय राई छुच्छा, राजरोवर्ट अजनवी सुब्बा, इक्साहाङ चेम्जोङ, राजा मावो, जानु काम्बाङ, सलोनी लिम्बूलगायत छन् ।
नुमाद्वारा अभिनित पछिल्लो म्युजिक भिडियो
नयाँअनलाइनसँग एप्समा पनि जोडिनुसक्नुहुनेछ । एन्ड्रइडको लागि यहाँ क्लिक गर्नुहोस् । त्यसैगरी हामीलाई फेसबुक, ट्वीटर र युट्युवमा पनि पच्छ्याउन सक्नुहुनेछ ।
