विराटनगर, १५ असोज ।
सद्भावना पार्टीका अध्यक्ष राजेन्द्र महतोले सरकारलाई प्रतिगामी चुनावको तयारीमा नलाग्न चेतावनी दिनुभएको छ ।
शनिबार विराटनगर विमानस्थलमा सञ्चारकर्मीहरूसँग कुराकानी गर्दै अध्यक्ष महतोले सरकारले आन्दोलनकारी शक्तिलाई पेलेर स्थानीय तहको निर्वाचन गरे त्यो राजा ज्ञानेन्द्रको पालामा जस्तै प्रतिगामी चुनाव हुने चेतावनी दिनुभएको हो ।
सत्तारुढ माओवादी र कांग्रेसले संविधान संशोधन प्रस्ताव दर्ता गर्न आलटाल गरेको भन्दै नेता महतोले भन्नुभयो –‘हामीले प्रचण्ड नेतृत्वमा सरकार बनाउने बेलामा तीन बुँदे सहमति गरेर सघाएका हौं । सहमतिअनुसार तिहार अगावै संविधान संशोधन प्रस्ताव दर्ता नगरे समर्थन फिर्ता लिन सक्छौं ।’
सरकारप्रतिको विश्वास गुम्दै गएको भन्दै उहाँले प्रतिपक्षी एमालेको रुखो स्वभावलाई देखाएर काँग्रेस र माओवादी नै जालझेल गर्ने खेलमा लागेको आरोपसमेत लगाउनुभयो । संविधान संशोधन प्रस्तावका विरुद्ध उभिने जोसुकैसँग सडकमा भिड्न तयार रहेको भन्दै महतोले भन्नुभयो –‘संविधान संशोधनमा जुन पार्टीले अवरोध गर्छ, त्यसविरुद्ध लड्छौं ।’
नयाँअनलाइनसँग एप्समा पनि जोडिनुसक्नुहुनेछ । एन्ड्रइडको लागि यहाँ क्लिक गर्नुहोस् । त्यसैगरी हामीलाई फेसबुक, ट्वीटर र युट्युवमा पनि पच्छ्याउन सक्नुहुनेछ ।
