काठमाडौं, १५ असोज ।
नयाँ शक्ति पार्टी नेपालका संयोजक डा. बाबुराम भट्टराईले प्रधानमन्त्री एवम् माओवादी केन्द्रका अध्यक्ष पुष्पकमल दाहाल प्रचण्डलाई राष्ट्रघाती भएको आरोप लगाउनुभएको छ ।
प्रधानमन्त्री प्रचण्डले आफू नेतृत्वको सरकार टिकाउन भारत गएर राष्ट्रघाती सम्झौता गरेको भन्दै संयोजक भट्टराईले यस्तो आरोप लगाउनुभएको हो । नयाँ शक्ति पार्टी नेपाल भक्तपुर जिल्ला समितिले गरेको दशैं शुभकामना आदानप्रदान कार्यक्रममा बोल्दै भट्टराईले भन्नुभयो –‘सत्ता जोगाउने नाउँमा भारतसँग भएको २५ बुँदे सम्झौता देशको हितमा छैन ।’
भारतसँगको सम्झौतापछि आफूलाई निन्द्रा नलागेको भन्दै उहाँले भन्नुभयो –‘प्रधानमन्त्रीले भारतसँग गरेको राष्ट्रघाती सम्झौताले मलाई पिरोलिरहेको छ ।’
सत्ता टिकाउने नाउँमा विदेशीसँग राष्ट्रघाती सम्झौताले मुलुकलाई फसाउने भट्टराईको तर्क थियो । संविधान संशोधन गरेर कार्यकारी राष्ट्रपतिको व्यवस्था गर्नुपर्ने भन्दै उहाँले पाँच वर्षसम्म स्थायी सरकार नचले देश विकास र समृद्धि प्राप्त नहुने बताउनुभयो ।
भारतसँग भएको २५ बुँदे सहमति गम्भीर भएर अध्ययन गर्न जनतालाई आग्रह गर्दै भट्टराईले भन्नुभयो –‘सम्झौता भएका बुँदामध्ये ६, १०, ११, १२, १३, १४ र २० बुँदा राष्ट्रियहित विपरित छन् । यसले नेपाललाई भुटानीकरणतर्फ धकेलेको छ ।’
नयाँअनलाइनसँग एप्समा पनि जोडिनुसक्नुहुनेछ । एन्ड्रइडको लागि यहाँ क्लिक गर्नुहोस् । त्यसैगरी हामीलाई फेसबुक, ट्वीटर र युट्युवमा पनि पच्छ्याउन सक्नुहुनेछ ।
