काठमाडौं, १४ आसोज ।
संघीय समाजवादी फोरम, नेपालका वरिष्ठ नेता अशोक राईले कुनै एउटा जाति विशेषलाई मात्रै काखी च्याप्ने कामबाट राज्य अघि बढ्न नसक्ने बताउनुभएको छ ।
शुक्रबार राजधानीस्थित ससफो पार्टी कार्यालय तीनकुनेमा आयोजित पार्टी प्रवेश कार्यक्रमलाई सम्बोधन गर्दै वरिष्ठ नेता राईले राज्यले सबै जाति र धर्म सम्प्रदायका चाडलाई समान व्यवहार र महत्व दिनुपर्ने बताउनुभएको हो । राईले भन्नुभयो –‘दशैंमा पड्किने तोप अन्य समुदायको चाडमा पनि पड्किनु पर्छ ।’ 
राज्यको विभेदकारी मानसिकताकै कारण अन्य गैरहिन्दु समुदायको पर्वमा तोप नपड्किएको भन्दै उहाँले भन्नुभयो –‘विविधता सम्मान गर्न ल्होसार, साकेला, माघी, छैठ पर्वहरूमा पनि राज्यको समान व्यवहार हुनुपर्दछ ।’
संघीय समाजवादीका संसदीय दलका नेतासमेत रहनुभएका राईले कसैको अधिकार खोस्न नभई समान हकहितको लागि आफूहरूले आन्दोलन जारी राखेको जिकिर गर्नुभयो । मधेसी समुदायको देशभक्तीमा कुनै शंका नगर्न आग्रह गर्दै उहाँले मधेसी जनता नेपालको असली राष्ट्रभक्त भएको स्पष्ट पार्नुभयो ।
कार्यक्रमका बीच रामेछाप जिल्लाका ७० जना भन्दा बढी युवा विभिन्न पार्टी परित्याग गरी संघीय समाजवादी फोरममा प्रवेश गरेका थिए । नेता राईले उनीहरूलाई अविर लगाएर पार्टीमा प्रवेश गराउनुभएको थियो ।
नयाँअनलाइनसँग एप्समा पनि जोडिनुसक्नुहुनेछ । एन्ड्रइडको लागि यहाँ क्लिक गर्नुहोस् । त्यसैगरी हामीलाई फेसबुक, ट्वीटर र युट्युवमा पनि पच्छ्याउन सक्नुहुनेछ ।
