झापा । यस वर्षको अम्बिका प्रतिष्ठान झापाले प्रदान गर्ने ‘आमा सम्मान’ गरामनी–३ हर्चनाकी सामाजिक कार्यकर्ता किरण तिम्सिनालाई दिइने भएको छ । साहित्यकार तथा पत्रकारद्वय कृष्ण धराबासी तथा कुमार भट्टराईकी ममतामयी आमा अम्बिकादेवी भट्टराईको स्मृतिमा स्थापित उक्त पुरस्कार सामाजिक सेवाको क्षेत्रमा ३ दशकभन्दा लामो समयदेखि सक्रिय तिम्सिनालाई प्रदान गरिने भएको हो ।
पुरस्कार हरेक वर्ष दशैंको अष्टमीमा प्रदान गरिन्छ । ११ हजार रुपैयाँ, सम्मान पत्र र दोसल्ला ओडाएर सम्मान गरिने प्रतिष्ठानले जनाएको छ । प्रतिष्ठानका अध्यक्ष कुमार भट्टराई र सचिव केशव मैनालीद्वारा जारी विज्ञप्तिमा भनिएको छ – ‘श्रीमानको असामयिक निधनपछि नाबालक तीन छोरीहरु र एक छोराको पठनपाठन र लालनपालनको जिम्मेवारीसँगै सामाजिक रुपले प्रतिष्ठित तथा आर्थिक सबल हुने मार्गमा अभिबृद्धि गर्न सफल हुनुभएकाले उहाँलाई सम्मान गर्ने निर्णय गरिएको हो ।’
ताप्लेजुङको फुङलिङ–३ निबासी आमा जानुका र बुवा शेषराज पौडेलकी जेठी सुपुत्री किरणको जन्म विक्रम् सम्बत् २०१४ सालमा भएको हो । उनको विवाह वि.सं. २०३२ सालमा पाँचथर थर्पु–३ का गणेश तिम्सिनासँग भयो । विवाह भएकै वर्षमा श्रीमान गणेश तिम्सिनाका साथ झापा भएकी किरणले वि.सं. २०४१ सालमा पतिवियोग सहनु प¥यो । ‘छोरीहरु र छोराप्रतिको गहन जिम्मेवारीलाई काँधमा लिएर उनीहरुलाई समाजमा स्थापित हुन अभिप्रेरित गरिरहेकी हुनाले आजसम्म आइपुग्दा सामाजिक र व्यावहारिक रुपमा आफ्ना सन्तानलाई परिपक्क पार्न सफल भएकाले र आफ्नो छुट्टै सामाजिक पहिचान स्थापित गर्न सफल हुनुभएकीले करण तिम्सिनालाई आमा सम्मान प्रदान गरिने भएको हो’ – विज्ञप्तीमा उल्लेख छ ।
आगामी ०७० असोज २३ गते आइतबार अष्टमीका दिन शनिश्चरे बजारस्थित सामुदायिक भवनमा आयोजित कार्यक्रममा उक्त सम्मान प्रदान गरिने छ । अम्बिकादेवी भट्टराईको स्मृतिमा स्थापित आमा सम्मान पाँच वर्षदेखि प्रदान गरिन्छ । यसअघि उक्त सम्मानबाट २०६७ मा गरामनीकै रेनुका रसाइली, २०६९ मा अर्जुनधारा–२ निवासी पार्वतीदेवी सुबेदी, २०७० सालमा अनारमनीकी विष्णुमाया गौतम, २०७१ मा विर्तामोड–२, चारपानेकी शशिकला राय र २०७२ मा भद्रपुर–६ की चित्रकला कोइराला सम्मानित भइसकेकी छिन् ।