काठमाडौँ, १८ असार । नेपाल भाषा परिषद्ले यस वर्षको ‘चित्तधर पुरस्कार’ भूषणप्रसाद श्रेष्ठ, ‘पूर्णहिरा पुरस्कार’ राजा शाक्य, ‘मोतीलक्ष्मी पुरस्कार’ अमिता धाख्खा र ‘केशवलाल कथा पुरस्कार’ पं दीपनारायण मिश्रलाई प्रदान गरेको छ ।
भाषासेवी श्रेष्ठ, शाक्यलाई नेपाल भाषाको विकासमा योगदान गरेबापत उपलब्ध गराइएको चित्तधर पुरस्कार र पूर्णहिरा पुरस्कारको राशि रु २५–२५ हजार र कदरपत्र छ ।
धाख्खालाई बौद्ध दर्शन साहित्यको प्रवद्र्धनमा सहयोग गरेकामा मोतीलक्ष्मी तथा पं मिश्रलाई भोजपुरी भाषा तथा साहित्यको समृद्धिमा योगदान गरेकामा प्रदान गरिएको केशवलाल कथा पुरस्कार दुवैको राशि रु १०–१० हजार छ ।
यहाँ आज आयोजित कार्यक्रममा परिषद्का सल्लाहकार फणीन्द्ररत्न वज्राचार्यलाई भाषासेवीको मानार्थ सम्मानसमेत दिइएको छ ।
सोही कार्यक्रममा वरिष्ठ मूर्तिकार गोविन्दनारायण ज्यापूले सर्जकलाई पुरस्कृत गर्ने परिपाटीले लेखकलाई साहित्य र कृति प्रकाशनमा प्रेरणा मिल्ने बताउनुभयो । परिषद्का अध्यक्ष सुवर्ण शाक्यले विभिन्न भाषाका साहित्य तथा संस्कृतिका लेखक तथा साहित्यकारलाई पुरस्कृत गर्ने संस्थाको नीति रहेको बताउनुभयो ।
समाजसेवी नवीन चित्रकारले नेपाल भाषाका कविकेशरी चित्तधर हृदयको ११०औँ जन्मजयन्तीका उपलक्ष्यमा ती पुरस्कार तथा सम्मान प्रदान गरिएको जानकारी दिनुभयो ।
नयाँअनलाइनसँग एप्समा पनि जोडिनुसक्नुहुनेछ । एन्ड्रइडको लागि यहाँ क्लिक गर्नुहोस् । त्यसैगरी हामीलाई फेसबुक, ट्वीटर र युट्युवमा पनि पच्छ्याउन सक्नुहुनेछ ।
