काठमाडौं । देशभर उचित वर्षाभइरहेको मौसम विज्ञान विभागले जनाएको छ ।
हिजोदेखि देशको पूर्वी भाग लगायत सबैतिर वर्षाभइरहेको विभागले जनाएको हो । विभागअन्तर्गत मौसम पूर्वानुमान शाखाले दिएको जानकारी अनुसार अविरल वर्षा भइरहे पनि आन्तरिक र बाह्य हवाई उडानमा भने कुनै समस्या नभएको बताइएको छ । तुवाँलो र कालो बादल आकाशमा नदेखिएकाले उडानमा कुनै समस्या नरहेको शाखाले जनाएको छ ।

धरानमै देशभरकै उच्च वर्षा, इटहरीमा बाढीले एकको मृत्यु
हिजो धरानमा देशभरकै उच्च वर्षा भएको पनि शाखाले जनाएको छ । धरानमा हिजो १०९ मिलिलिटर वर्षा भएको थियो । हिजोको वर्षाका कारण पूर्वका झापा, मोरङ र सुनसरी जिल्लाका विभिन्न स्थान जलमग्न भएका थिए । नदी, खोलाहरूमा पानीको वहाव बढेर बाढी पसेका कारण विभिन्न गाउँवस्ती डुबानमा परेका थिए ।
बाढीले इटहरी ४ का ६६ वर्षीय रामबहादुर बराइलीको मृत्यु भएको थियो । त्यस्तै, अत्याधिक वर्षापछि सप्तकोशी नदीमा पानीको वहाव बढेको बताइएको थियो । मंगलबार साँझ कोशी व्यारेजमा एक लाख ४० हजार ७० क्यसेक पानी मापन गरिएको थियो भने ५६ ढोकामध्ये ४१ वटा ढोका खोलेर पानीलाई निकास दिइएको थियो । आज पनि पूर्वीभेग लगायत देशैभर वर्षा भइरहेको बताइएको छ । मनसुन सुरु भएकाले तत्कालै वर्षा रोकिने सम्भावना नरहेको मौसम विज्ञान विभागले जनाएको छ ।