बागलुङ, ४ असार । नेपाली दलित आन्दोलनका अगुवा भगत सर्वजित विश्वकर्माको सालिक निर्माण गरिएको छ ।
बागलुङ नगरपालिका –७ गैरागाउँमा निर्मित सालिकको शुक्रबार शिक्षामन्त्री गिरीराजमणि पोखरेलले अनावरण गर्नुभयो । कालीमाटी, गैरागाउँ विश्वकर्माको जन्मथलो हो । विश्वकर्मा जातीय मुक्ति आन्दोलनका प्रणेता हुन् । कठोर राणाकालमा पनि दलित मुक्ति आन्दोलनका लागि विश्वकर्माले दिनुभएको योगदान स्मरणीय छ । नेपाली दलित आन्दोलनलाई एकीकृत रुपमा अघि बढाउन विश्वकर्माले खेलेको भूमिका महत्वपूर्ण छ ।
समाज सुधारकको समेत परिचय बनाउनुभएका विश्वकर्माले १९९७ सालमा पहिलो पटक बागलुङबाट दलित आन्दोलनको सुरुआत गर्नुभएको थियो । बागलुङको शैक्षिक विकासमा पनि उहाँको उल्लेख्य योगदान छ ।
विश्वकर्माले २००७ सालमा मूलपानीमा विश्वकर्मा प्रावि स्थापना गर्नुभएको थियो, जुन अहिले विश्वकर्मा उच्चमाविको रुपमा सञ्चालित छ ।
उहाँले धार्मिक, सांस्कृतिक, आर्थिक, शैक्षिक र सामाजिक हिसाबले दलित समुदायलाई अधिकारसम्पन्न बनाउनुपर्ने विषयलाई मूल रुपमा उठाउनुभएको थियो । जातीय छुवाछुत अन्त्य गर्नुपर्छ भनेर उहाँले आन्दोलन र सामाजिक जागरणका कार्यक्रम सञ्चालन गर्नुभएको थियो ।
उहाँको व्यक्तित्व र पहिचानलाई जोगाइराख्न भगत सर्वजित विश्वकर्मा प्रतिष्ठान समेत स्थापना गरिएको छ । प्रतिष्ठानले नै विश्वकर्माकोे सालिक निर्माण गरेको हो । जातीय मुिक्तका लागि सारा जीवन अर्पण गर्नुभएका विश्वकर्माको सम्मानमा सालिक निर्माण गरिएको प्रतिष्ठानका कावा अध्यक्ष ओमबहादुर विश्वकर्माले बताउनुभयो ।
नयाँअनलाइनसँग एप्समा पनि जोडिनुसक्नुहुनेछ । एन्ड्रइडको लागि यहाँ क्लिक गर्नुहोस् । त्यसैगरी हामीलाई फेसबुक, ट्वीटर र युट्युवमा पनि पच्छ्याउन सक्नुहुनेछ ।
