मेलम्ची, २९ जेठ । इलाका प्रहरी कार्यालय मेलम्चीको रोहवरमा तीन बालिकालाई चाइल्ड नेपालले शुक्रबार राति सम्बन्धित परिवारलाई जिम्मा लगाएको छ ।
सिन्धुपाल्चोक जिल्लाको लागर्चे गाविसका तीन बालिकालाई धादिङबाट प्रहरीले नियन्त्रणमा लिई सोधपुछ गर्दा केही नखुलेकाले बालबालिकाको हकहितमा काम गर्ने संस्थामार्फत परिवारलाई जिम्मा लगाएको हो ।
इलाका प्रहरी कार्यालयका प्रहरी निरीक्षक नीरज डाँगीका अनुसार घरबाट परिवारलाई समेत थाहा नदिई भागेको र परिवारले प्रहरीमा उजुरी गरेकाले धादिङमा फेला परेका बालिकालाई चाइल्ड नेपाल र महिला तथा बालबालिका कार्यालयको सहयोेगमा प्रहरीमार्फत आआफ्नो परिवारलाई जिम्मा लगाएको हो ।
पन्ध्र वर्षभन्दा कम उमेरका तीन बालिका गत २४ गते साथीकोमा कपडा लिन जान्छु भनेर गएको र रात परेपछि समेत नआएको र आफन्तलाई समेत खबर गर्दा पत्ता नलगाएपछि प्रहरीमा उजुरी दिएको बालिकाको परिवारले बताएको छ ।
प्रहरी निरीक्षक डाँगीका अनुसार घरको आर्थिक अवस्था कमजोर भएकाले र घरबाट समेत ख्याल नगर्ने भएकाले बालबालिका आफूखुसी घर छाडेर जाने गरेको बताउनुभयो ।
नयाँअनलाइनसँग एप्समा पनि जोडिनुसक्नुहुनेछ । एन्ड्रइडको लागि यहाँ क्लिक गर्नुहोस् । त्यसैगरी हामीलाई फेसबुक, ट्वीटर र युट्युवमा पनि पच्छ्याउन सक्नुहुनेछ ।
