सन्देश सुब्बा
पाँचथर । पूर्व गृहमन्त्री तथा राप्रपा नेपालका नेता स्व.पद्मसुन्दर लावतीको शालिक लावतीको गृह जिल्ला पाँचथरको यासोकमा बिहीबार अनावरण गरिएको छ । स्व. लावतीको शालिक एक समारोहका बीच भूमिसुधार तथा व्यवस्था मन्त्री रामकुमार सुब्बाले अनावरण गरेका हुन् ।
सामाजिक संस्था पापोहाङ लावती सयङले ७ लाख रुपैंयाँको लागतमा फाइबर ग्लासयुक्त शालिक निर्माण गरेको हो । वि.सं. २०२९ सालमा ३४ वर्षको उमेरमा उद्योग राज्यमन्त्री बनेका लावतीले त्यसपछि गृह सहित विभिन्न १२ वटा मन्त्रालय सम्हालेका थिए । मन्त्री भएको समयमा जिल्लाको विकासमा महत्वपूर्ण योगदान गरे बापत त्यसको सम्मानमा शालिक निर्माण गरिएको पापोहाङ लावती सयङका उपाध्यक्ष बिजयबोध लावतीले बताए ।
स्व.लावतीको जन्म वि.सं. १९९६ श्रावण ७ गते पाकिस्तानको क्वेटामा भएको थियो । उनको मृत्यु वि.सं.२०७२ जेठ २७ गते काठमाण्डौमा भएको थियो । विकासप्रेमी नेताको रुपमा परिचित स्व.लावतीको योगदानको उच्च मूल्याङकनका साथ युगपुरुषको दर्जा प्रदान गर्दै सालिक निर्माण गरिएको सयङ्का उपाध्यक्ष लावतीले बताए ।
पाँचथरको यासोकबाट राजनीतिक यात्रा सुरु गरेका स्व. लावतीप्रति सम्मान व्यक्त गर्दै मन्त्री सुब्बाले सरकारले चाँडै भूउपयोग नीति लागु गर्न लागिरहेको बताए । ३ वर्ष भित्रमा सुकुम्बासी समस्या समाधान गर्ने गरि आवस्यक गृहकार्य भइरहेको मन्त्री सुब्बाको भनाई थियो । त्यस्तै छुट जग्गा दर्ता गर्ने विषयमा पनि विभागिय निर्णय भइसकेको मन्त्री सुब्बाले बताए ।
नयाँअनलाइनसँग एप्समा पनि जोडिनुसक्नुहुनेछ । एन्ड्रइडको लागि यहाँ क्लिक गर्नुहोस् । त्यसैगरी हामीलाई फेसबुक, ट्वीटर र युट्युवमा पनि पच्छ्याउन सक्नुहुनेछ ।
