मनि राई गोठाले
कविलायुगिन,
युद्घका कुटिल बान्ताहरु,
म देखिरहेछु ,
गन्हाईरहेछ मलाई,
र दिनदिनै नमिठो डकारछु म ।
मेरो पौरखले,
चारकिल्ला ठोकेर घेरेको सिंहदरबारभित्र,
पुग्नु छ मलाई,
बस्नु छ मलाई ।
जहाँ म,
आदिम्ताको कर्दा खुर्पिले,
एकल प्रभुत्वमाथि,
मुलबासीको नाममा कचुर हानेर,
पराजित गर्नसकुँ ,
त्यहाँका सकुनी मोक्षहरुलाई ।
खन्याउँदै,
भू–स्वामित्वको चिनारीबाट,
विवेकको चोखो जाँड,
अनि,
म फलाक्न सकुँ ,
मसानहरुको हालिमुहाली छेत्छेती ।
र,
विरासतको जोखनामा,
आधिकारीकहरु छुट्टयाउँन सकुँ ,
सिंहदरबारको भोगचलन,
मेरो जस्तै,
र म जस्तै,
धेरै,धेधेरै मान्छेहरु,
चिम्से आँखा र नेप्टे नाकका ।
– मंगलबार २५ जेठ २०७३ धरान १३ अमरहाट
नयाँअनलाइनसँग एप्समा पनि जोडिनुसक्नुहुनेछ । एन्ड्रइडको लागि यहाँ क्लिक गर्नुहोस् । त्यसैगरी हामीलाई फेसबुक, ट्वीटर र युट्युवमा पनि पच्छ्याउन सक्नुहुनेछ ।
