काप्पोबा चुम
“जेठ नु असार हिलो मात्र
माया त भन्नू पिलो मात्र ”
भन्दै पालाम गाउने खोक्लिङे जेठाले बिहे गरेछ ।
भिरैमा फूल्यो मेरो माया
लाहुरेको भन्नू सुनैको छाया ,
गोठमा बस्छु जान्दिन गणित
म परे हजुर लाहुरे पिडित ,
यस्तै .. यस्तै बिरहको पालाम गाउथ्यो जेठा
साच्चै –
लुङजङे जेठा लाहुरबाट आकै दिन हो
खोक्लिङे जेठाको मन बिरक्तिएको
लाग्छ-
आमा बित्दा नि त्यति नरोएको जेठा
चिलले टिपिक्क चल्ला टिपे जस्तो
दोभाने कान्छिलाइ लुङजङेले टिपिक्क टिपेर लग्दा
बेस्मारी भक्कानिएको थियो ।
हाउ जेठा ..!
आसामै जानू रेल मात्रै
माया त भन्नू खेल मात्रै ,
दुख र सुख घाम – छाया
के रुन्छन जेठा सम्झी माया ,
भन्दै ठट्याउली गर्दै –
हिटिघर माइलिले जिस्क्याको हिजै जस्तो लाग्छ
अचम्मै ..भो !
खोक्लिङे जेठाले बिहे गरेछ ।
सेन्छ्रेङ्ला ला?ओ चादुम ला?बे
आहिङ्नीभागर आदुम ला?बे
यत्तिनै भनी थिइन लाम्धुङ्दो कान्छिले
खै के भयो ..
त्यसै .. त्यसै माया लागेर आयो
ओइलिएको फूल जागेर आयो
अनि त जाउ हाउ .. भनेर ल्याए पो भन्दै मुसुक्क हास्यो जेठा
खुसी छ आज बिरहको पालाम गाउने खोक्लिङे जेठा
हो खोक्लिङे जेठाले बिहे गरेछ ।
नयाँअनलाइनसँग एप्समा पनि जोडिनुसक्नुहुनेछ । एन्ड्रइडको लागि यहाँ क्लिक गर्नुहोस् । त्यसैगरी हामीलाई फेसबुक, ट्वीटर र युट्युवमा पनि पच्छ्याउन सक्नुहुनेछ ।
