बुटवल, २६ जेठ । नेकपा माओवादी केन्द्रका अध्यक्ष पुष्पकमल दाहालले माओवादी घटकबीचको पार्टी एकताले नयाँ अवसर र चुनौती दुवै सिर्जना गरेको बताउनुभएको छ । उहाँले माओवादी केन्द्रले अब जनतामा जाने प्रक्रिया थालेकाले एकताबाट नयाँ
आन्दोलनको थालनी हुने बताउनुभयो ।
सो पार्टीको आज बुटवलमा आयोजित प्रदेश नं ५ को एकता भेला तथा कार्यकर्ता प्रशिक्षण कार्यक्रममा बोल्दै पार्टी अध्यक्ष दाहालले एकताले नेपाली कम्युनिस्ट आन्दोलनमा नयाँ सन्देश दिएको चर्चा गर्नु भयो ।
विभिन्न विवाद र बहसले विगतमा पार्टी विभाजित भए पनि ऐतिहासिक आवश्यकताले पुनः क्रान्तिकारी शक्तिहरु एकताबद्ध भएको भन्दै दाहालले जनताको मन जितेर अब पार्टी बलियो हुने बताउनुभयो ।
पार्टी एकतामा मोहन वैद्यलाई ल्याउने धेरै प्रयास गरे पनि वैद्यले समयानुसार माक्र्सवादलाई बोध गर्न नसक्नाले प्रयास सफल हुन नसकेको बताउँदै उहाँले बाबुरामले माक्र्सवाद नै छोडेको भन्दै आलोचना गर्नुभयो ।
कार्यक्रममा विभिन्न दलबाट एकता प्रक्रियामा आएका मओवादी केन्द्रका नेताहरु रामबहादुर थापा ‘बादल’, मातृका यादव, मणि थापा, जयपुरी घर्ती, तिलक परियार, वसन्त घर्तीलगायतका नेताले एकताले नयाँ क्रान्तिको थालनी गरेको उल्लेख गर्नु भयो । यस्तै माओवादी केन्द्रको बुधबार बुटवलमा आयोजित एकता
भेलाको नाम दिएको सो प्रदेश नं ५ को कार्यकर्ता भेटघाट कार्यक्रमको
रुपन्देहीका बहुमत जिल्ला सदस्यहरुले बहिष्कार गरेको घोषणा गरेका थिए ।
नयाँअनलाइनसँग एप्समा पनि जोडिनुसक्नुहुनेछ । एन्ड्रइडको लागि यहाँ क्लिक गर्नुहोस् । त्यसैगरी हामीलाई फेसबुक, ट्वीटर र युट्युवमा पनि पच्छ्याउन सक्नुहुनेछ ।
