काठमाडौं, २५ जेठ । दक्षिण कोरियालाई कर्मभूमि बनाउँदै आएका गजलकार देव सागरको ‘असिनाको तिहुन’ नामक गजलसंग्रह सार्वजनिक भएको छ ।
‘असिनाको तिहुन’ सार्वजनिक गर्दै डा. कृष्णहरि बरालले गजलकार देव सागर नेपाली गजल क्षेत्रमा राम्रो सम्भावना बोकेको गजलकार भन्दै बधाइ तथा शुभकामना दिएका थिए ।
नाटक र कथालेखनमा समेत सक्रिय सागरलाई सोही कार्यक्रमको अवसर पारेर गोधूलि साहित्यिक प्रतिष्ठान काठमाडौंले सम्मानसमेत गरेको थियो । नेपाली भाषा, साहित्य र संस्कृति जगेर्नाका लागि योगदान दिएको भन्दै उनलाई सम्मान गरिएको हो ।
आफ्ना रचना संरक्षण हुने भएकाले कृति प्रकाशन गरेको गजलकार देव सागरले बताए । ‘असिनाको तिहुन’ मा प्रेम, घृणा, वर्गसंघर्ष, देशको वर्तमान अवस्था, परदेशी हुनुको पीडालगायत विषयमा लेखिएका एक सय एक गजल सामावेश छन् ।