इलाम, १६ फागुन । वाणिज्य तथा आपूर्ति मन्त्री गणेशमान पुनले आपूर्ति सहज बनाउन सरकारीस्तरबाट अनुगमन थालिएको बताउनुभएको छ ।
इलामको दानाबारीस्थित शुक्रबारे बजारमा ३४औँ मगरसङ्घ स्थापना दिवस तथा प्रथम सहिद क्याप्टेन लखन थापाको शालिक आज अनावरण गर्दै मन्त्री पुनले “नाकाबन्दी खुलेपनि सहज आपूर्ति सहज नभइरहेको अवस्थामा बजारमा अनुगमन थालेका छौँ”– उहाँले भन्नुभयो– “बजारलाई स्वस्थ र व्यवस्थित बनाउन काम गरिरहेका छौँ । एकीकृत रूपमा आपूर्तिको व्यवस्था मिलाइरहेका छौँ ।”
शालिक अनावरण गर्दै उहाँले आन्दोलनबाट प्राप्त सबै उपलब्धि संविधानमा संस्थागत नभए पनि पाएका उपलब्धिको रक्षा गर्दै अघि बढ्नुपर्नेमा जोड दिनुभयो ।
उहाँले व्यवसायीलाई भएजति सक्दो, सुलभ र समानुपातिकरूपमा आपूर्ति सहज बनाउनुहोस् भन्दै बजारलाई पारदर्शी बनाउन प्रत्येक पसलमा मूल्यसूची राख्न लगाउन स्थानीय प्रशासनलाई निर्देशनसमेत दिनुभयो ।
“बजारमा नागरिक मूल्यमा ठगिन हुँदैन”– उहाँले भन्नुभयो– “औषधिदेखि सबै खाद्यान्नको मूल्यसूची र यसका बारेमा सूचना दिनुहोस् । बजारलाई पारदर्शी बनाउँछौँ ।” उहाँले पूर्णरूपमा आपूर्ति हुन नसकेको स्वीकार्दै, विस्तारै सहज बनाउने प्रतिबद्धतासमेत व्यक्त गर्नुभयो ।
मन्त्री पुनले आपूर्ति सहज बनाउने काममा भारत र चीन दुवै असल छिमेकी मित्र भएको उहाँको भनाइ थियो । “सहज आपूर्तिका लागि चीनतिरको नाका खोल्ने काम भइरहेको छ”– उहाँले भन्नुभयो– “काम सुरू भइसकेको छ, यसले आपूर्ति सहज बनाउने विश्वास छ ।”
नेपाल मगरसङ्घ इलामका अध्यक्ष भक्त लुङ्गेलीले अल्पसङ्ख्यक जातिबाट बहुसङ्ख्यक जाति विरूद्ध संविधान जारी भएको र संविधानले आदिवासी जनजातिलाई विभेद गरेको आरोप लगाउनुभयो ।
शालिक निर्माणका लागि सङ्घसंस्था र विभिन्न व्यक्तिबाट रु छ लाख १४ हजार ७६९ नगद जम्मा भएको थियो ।
नयाँअनलाइनसँग एप्समा पनि जोडिनुसक्नुहुनेछ । एन्ड्रइडको लागि यहाँ क्लिक गर्नुहोस् । त्यसैगरी हामीलाई फेसबुक, ट्वीटर र युट्युवमा पनि पच्छ्याउन सक्नुहुनेछ ।
