सुरुङ्गा (झापा), १६ फागुन । प्रहरीको केन्द्रीय अनुसन्धान ब्युरो र इलाका प्रहरी कार्यालय विर्तामोड (अनारमनी) झापाले लोपोन्मुख रेडपान्डाको दुई थान काँचो छालासहित दुई जनालाई झापाबाट पक्राउ गरेको छ ।
पक्राउपर्नेमा पाँचथरको फलैँचा– ९ निवासी २० वर्षीय सुकवीर राई र ताप्लेजुङ सादेवा– ४ घर भई हाल शनिअर्जुन नगरपालिका– ९ बस्दै आएका ४७ वर्षीय कमलकुमार माङमु रहेका छन् । उनीहरुलाई शनिबार बिर्तामोडको फेमिली होटलबाट पक्राउ गरी आज सार्वजनिक गर्दै जिल्ला वन कार्यालय झापालाई बुझाएको छ ।
एकहप्ता अगाडिमात्र मारिएको रेडपान्ड (हाब्रे) काठमाडौँ लैजाने तयारी गर्दै गर्दा विशेष सूचनाका आधारमा उनीहरुलाई पक्राउ गरिएको प्रहरी प्रधान कार्यालयका प्रहरी उपरीक्षक दिवेश लोहनीले जानकारी दिनुभयो ।
राष्ट्रिय निकुञ्ज तथा वन्यजन्तु ऐन, २०२९ तथा साइटिस महासन्धी १९७५ विरुद्धको अपराध भएकाले उनीहरुलाई जिल्ला वन कार्यालय बुझाइएको उहाँले बताउनुभयो ।
नयाँअनलाइनसँग एप्समा पनि जोडिनुसक्नुहुनेछ । एन्ड्रइडको लागि यहाँ क्लिक गर्नुहोस् । त्यसैगरी हामीलाई फेसबुक, ट्वीटर र युट्युवमा पनि पच्छ्याउन सक्नुहुनेछ ।
