काठमाडौँ, २१ माघ । संस्कृति, पर्यटन तथा नागरिक उड्डयनमन्त्री आनन्दप्रसाद पोखरेलले खेलकुद क्षेत्र देशको पहिचान भएको बताउनुभएको छ ।
सेन्ट जर्ज इन्टरनेसनल स्कूलले आज यहाँ आयोजना गरेको ‘सातौँ राष्ट्रपति रनिङ सिल्ड प्रतियोगिता–२०७२’ को समापन तथा पुरस्कार वितरण कार्यक्रममा उहाँले खेल क्षेत्रले नै राष्ट्रलाई संसारमा चिनाउने भएकाले राष्ट्रको पहिचान भएको बताउनुभयो ।
मुलुकको राष्ट्रियता, सार्वभौमसत्ता बलियो बनाउनका लागि विद्यालयदेखि नै विद्यार्थीलाई राष्ट्रवादी बनाउनुपर्नेमा मन्त्री पोखरेलको जोड थियो ।
उहाँले खेलकुद क्षेत्रको विकासका लागि नेपालको संविधानमा विशेष व्यवस्था गरेको समेत जानकारी गराउनुभयो ।
राष्ट्रिय निजी तथा आवासीय विद्यालय एसोसिएसन (नेसनल प्याब्सन)का अध्यक्ष कर्णबहादुर शाहीले राष्ट्रपति रनिङ् सिल्ड प्रतियोगिता देशव्यापी सञ्चालन भइरहेको र सरकारले सरकारी विद्यालयलाई प्रोत्साहनस्वरुप रु १० हजार दिएको तर निजी विद्यालयलाई नदिएर विभेद गरेको बताउनुभयो ।
निजी तथा आवासीय विद्यालय अर्गनाइजेसन (प्याब्सन)का वरिष्ठ उपाध्यक्ष विजय सम्वाहाम्फेले शैक्षिक क्षेत्रमा खेलकुद एउटा पौष्टिक आहार भएको भन्दै मानिसको समग्र वृद्धि विकासका लागि खेल अति आवश्यक भएको विचार व्यक्त गर्नुभयो ।
विद्यालयका अध्यक्ष डा सुवास घिमिरेले खेलकुदले विद्यार्थीलाई ऊर्जा प्रदान गर्ने, शरीरमा फुर्ति जगाउनुका साथै ध्यान एकीकृत गराउन सहयोग पुग्ने बताउनुभयो ।
कार्यक्रममा प्रतियोगितामा प्रथम हुने बूढानीलकण्ठ स्कूल, द्वितीय रिपुमर्दन सैनिक स्कूल र तृतीय हुने दीक्षान्त स्कूलका विद्यार्थीलाई मन्त्री पोखरेलले शिल्ड तथा प्रमाणपत्र वितरण गर्नुभयो । प्रतियोगितामा १२ वटा स्कूलले भाग लिएका थिए ।
नयाँअनलाइनसँग एप्समा पनि जोडिनुसक्नुहुनेछ । एन्ड्रइडको लागि यहाँ क्लिक गर्नुहोस् । त्यसैगरी हामीलाई फेसबुक, ट्वीटर र युट्युवमा पनि पच्छ्याउन सक्नुहुनेछ ।
