क्वालालम्पुर । स्याङ्जा जिल्लाबाट मलेसियामा बिभिन्न क्षेत्रमा कार्यरत तथा आफ्नै व्यवसाय गर्दै आएका स्याङ्जावासीहरूले ‘स्याङ्जा सहयोग समाज राष्ट्रिय समन्वय समिति मलेसिया’ गठन गरेका छन् । स्याङ्जा सहयोग समाज अन्तर्राष्ट्रिय समन्वय समितिका सचिव चन्द्रकला तिवारीको प्रमुख आतिथ्यमा सोमबार राजधानी क्वालालम्पुरमा समिति गठन गरिएको हो । लामो समयदेखि मलेसियामा व्यवसाय गर्दै आएका तथा निवर्तमान एनआरएन आइसिसिका सदस्यसमेत रहेका भवानी शंकर तिवारीको अध्यक्षतामा समितिले १० सदस्यीय कार्य समिति चयन गरेको छ । समितिको उपाध्यक्षमा धर्मराज अर्याल, सचिवमा चेतनारायण न्यौपाने, सह–सचिव सन्तोषी भट्टराई तिवारी, कोषाध्यक्षमा कुशल भट्टराई तथा सदस्यहरूमा हरि कोईराला, गंगाधर सुवेदी, गोविन्द रेग्मी, विनोद गैरे तथा डोलराज न्यापाने रहेका छन् । समितिले श्यामकला तिवारी तथा चोलाकान्त पंगेनीलाई सल्लाहकारमा चयन गरेका छन् । अध्यक्ष तिवारीले विशेषगरि मलेसियामा रहेका स्याङ्जावासी र सम्पूर्ण नेपालीहरूको हकहितमा काम गर्ने र जिल्लालाई पनि परेको बेला आपसी सरसहयोग गर्नका लागि समिति गठन गरेको बताए । यस समितिले मलेसियामा गठन भएका अन्य संघ संगठनहरूसंग हातेमालो गर्दै अघि बढ्ने र नेपालीहरू जहाँ जसरी रहे पनि एकताबद्ध भई दुःख सुखमा साथ दिने जानकारी दिए । समितिले प्रत्येक महिनाको आईतबार क्वालालम्पुरको गोर्खा रेष्टुरेण्टमा बैठक बस्ने निर्णय गरेको छ ।
नयाँअनलाइनसँग एप्समा पनि जोडिनुसक्नुहुनेछ । एन्ड्रइडको लागि यहाँ क्लिक गर्नुहोस् । त्यसैगरी हामीलाई फेसबुक, ट्वीटर र युट्युवमा पनि पच्छ्याउन सक्नुहुनेछ ।
